«Аекспертиза иаанарҧшыз атехникатә ҭагылазаашьа цәгьа амшала Аиустициа аҩны аҧхьа иҟоу ашьапылацҳа еимырхуеит», — иҳәеит Қарҭ ахада Каха Калаӡе  аҳҭнықалақь аиҳабыра иахьатәи реилатәараҿы.

Иара иажәақәа рыла, зыӡбахәы ҳәоу ацҳа аҭагылазаашьеи уи иалаҵатәыз аҧара дуи амшала ацҳа аиҭашьақәыргылара иаҧсам.

«Аексперттә биуро ишышьақәнаргылаз ала, Аиустициа аҩны аҧхьа иҟоу ашьапылацҳа атехникатә ҭагылазаашьа цәгьоуп.  Ацҳа аиҭашьақәыргыларазы аҧара ду аҭахуп, насгьы, ари ацҳа зылшарақәа маҷу ауаа ирзыманшәалам. Аекспертцәа реихшьаалаҿы еилыкка иануп абри аҩыза аҭагылазаашьаҿы ацҳа ахархәара шыҟамло, уи еимыхны, ацҳа ҿыц шыргылатәу», — иҳәеит  Каха Калаӡе.

Қарҭ ахада ишазгәеиҭаз ала,   зыӡбахәы ҳәоу аҭыҧаҿ ашьапылатә аиасырҭақәеи асветофорқәеи шьақәыргылоуп, ауаа шәарҭада аиҭаҵра рылшоит, убри аҟынтә, ауаа ршәарҭадара ахьчаразы, Аиустициа аҩны аҧхьа иҟоу ашьапылацҳа еимырхуеит.