Аҳҭнықалақь ахада Каха Калаӡе Қарҭ ахадара аҩныҵҟатәи аудити амониторинги амаҵуреи ихаҭыҧуааи ирыдиҵеит ақәоура амшала аметростанциа  „Авлабар“ аҿы иҟалаз апроблемақәа ҭырҵаарц.

Қарҭ амуниципалитет аиҳабыра реилатәараҿы Калаӡе ишиҳәаз ала, ҩышықәса раҧхьа ари аметростанциаҿы аиҭашьақәыргыларатә усурақәа мҩаҧган, убри аҟынтә, хымҧада еилкаатәуп, аметростанциа еиҭах аӡы зҭалаз.

„ Ҩышықәса раҧхьа еиҭашьақәыргылаз аметростанциа  „Авлабар“ еиҭах аӡы ҭалеит. Ҳазынтәгьы акадрқәа ҳбеит, адәахьы ақәа ишауаз еиҧшҵәҟьа аметростанциа аҩныҵҟагьы ақәа ауан. Аҭагылазаашьа цәгьан. Апроблемақәа иҟоуп, уи фактуп.  Сара Қарҭ ахадара аҩныҵҟатәи аудити амониторинги амаҵуреи схаҭыҧуааи ирыдысҵеит ақәоура амшала аметростанциа  „Авлабар“ аҿы иҟалаз апроблемақәа ҭырҵаарц. Заанаҵы ак сҳәар сҭахым, аха, аилахәырақәа зегьы, дара инарыгӡо апроектқәа рзы аҭак рыҧхықәуп, аусурақәа зегьы ибзианы инагӡазароуп, уи аҵакы ду амоуп. Ишубарҭоу ала, аусурақәа рынагӡараан агха рыхьит. Уи зхароу сыздырӡом. Аудит амаҵзура ари аҭагылазаашьа аҭҵаара иауалуп, иаҭаххар, иашьашәалоу ашьаҿақәа ҟарҵароуп“, – иҳәеит Қарҭ ахада.