«Лабҿаба иубарҭоуп Қырҭтәыла ахада Аконституциа шеилалго, уи ихьанҭаӡоу хҭысуп, ҳара ари афакт иахәҭоу ақәҿыҭра аҳҭароуп», — иҳәеит апартиа  «Ақырҭуа гәахәтәы» ахантәаҩы  Иракли Кобахиӡе.

Иракли Кобахиӡе ишазгәеиҭаз ала,  Қырҭтәыла апарламенттә республикоуп, араҟа анагӡаратә мчы, аиҳабыра роуп Қырҭтәыла аҩныҵҟатәии адәныҟатәии политика мҩаҧызго, атәыла ахада анагӡаратә мчы даҵанакәам, убри аҟынтә, адәныҟатәи аполитика амҩаҧгара далахәым.

«Убри адагьы, Қырҭтәыла Аконституциа иануп атәыла ахада адәныҟатәи аполитикаҿ ахаҭарнакратә еизыҟазаашьақәа рымҩаҧгареи аиҿцәажәарақәа рылахәызаареи шлылшо Қырҭтәыла аиҳабыра рықәшаҳаҭра мацарала. Убри аҟынтә, лабҿаба иубарҭоуп Қырҭтәыла ахада атәыла Аконституциа шеилалго.

Сара ари азҵаара хшыҩзышьҭра азызуамызт, избанзар, ҳара уезгьы иаадыруеит  Саломе Зурабишвили атәыла евроинтеграциа дшаҿагыло. Лара Қырҭтәыла апарламентаҿ аума, аҳәаанырцәтәи авизитқәа раан аума, евроинтеграциа даҿагыланы аҳәамҭақәа ахьыҟалҵо зегьы дара роуп. Жәларбжьаратәи ҳпартниорцәа уезгьы ари аинформациа роуеит. Ишәгәалашәозар ҟалап лара Қырҭтәыла апарламентаҿ данықәгылоз ҳтәыла евроинтеграциа иаҧырхагаз аҳәамҭақәа шыҟалҵоз. Лымкаала, лара илҳәеит ҵыҧх Қырҭтәыла акандидат астатус ахәҭамызт ҳәа, насгьы, Евроеидгыла адокументқәа рыла иазҧхьагәаҭоу ареформақәа формалла имҩаҧысуеит ҳәа лҳәеит. Убри аҟынтә, ишубарҭоу ала, Қырҭтәыла сынтәагьы акандидат астатус ахәҭам ҳәа лгәы иаанагоит. Ҳпартниорцәа абри зегьы раҳауеит, убри азоуп изаҳҳәо  Саломе Зурабишвили ҳтәыла европатәи аперспектива даҿагылоит ҳәа», — иҳәеит  Кобахиӡе.