«Азовсталь» ахьчаҩцәа, Владимир Зеленски ицны, Ҭырқәтәылантә Украинаҟа ихынҳәуеит
«Азовсталь» ахьчаҩцәа урыстәылатәи атҟәараҟынтә Украинаҟа ихынҳәуеит.
Ари аинформациа алаирҵәеит Украина ахада Владимир Зеленски.
«Ҳара, ҳфырхацәа ҳаманы, Ҭырқәтәылантә аҩныҟа ҳхынҳәуеит. Украинатәи аруаа: Денис Прокопенко, Свиатослав Паламарь, Сергеи Волынски, Олег Хоменко, Денис Шлега рҭаацәарақәа ирзыхынҳәуеит», — иҩит Зеленски.
«Азовсталь» ахьчаҩцәа атҟәараҟынтә рхы иақәиҭыртәит 2022 шықәса цәыббразы, иахьанӡа дара Ҭырқәтәыла иҟан. Арратә атҟәацәа реиҭныҧсахлара азы урыстәылатәи аган рҟны аиҿцәажәарақәа мҩаҧигон Ҭырқәтәыла ахада Реџьеп Таип Ердоҕан.