Урыстәыла ахада ицхырааҩ Иури Ушаков иҳәамҭала, Америкеи Урыстәылеи Дональд Трампи Владимир Путини реиҧылара апрограммазы еиқәшаҳаҭхеит.

Иара ишазгәеиҭаз ала, аиҧылара мҩаҧгахоит ирҭбаау аформатла,  5+5 аформула ала.

«Атәылақәа рхадацәа инарываргыланы, аиҧылара рхы аладырхәоит аган цыҧхьаӡа аҟынтә 5ҩык-5ҩык. Џьара ааигәа аекспертцәагьы иҟазаауеит», — иҳәеит Ушаков.

Иара иажәақәа рыла, Трампи Путини ишиашо реиҧылара иалагоит москватәи аамҭала асааҭ  22:30 рзы. Аиҧылара ашьҭахь, аделегациа алахәылацәа аусуратә шьыжьхьаҿы еизоит.

Аиҿцәажәарақәа рышьҭахь, Дональд Трампи  Владимир  Путини апресс-конференциа мҩаҧыргоит.

Москва аинформациа инақәыршәаны, урыстәылатәи аделегациа иалоуп атәыла ахада ицхырааҩ Иури Ушакови, адныҟатәи аусқәа рминистр  Сергеи Лаврови, атәылахьчара аминистр Андреи  Белоусови, афинансқәа рминистр  Антон Силуанови, атәым тәылақәа рҟны аинвестициа-економикатә усеицура азҵаарақәа рзы атәыла ахада ихаҭарнак ҷыда  Кирилл Дмитриеви.