Қырҭтәыла аҧыза-министр Иракли Кобахиӡе Қвешеҭии Кобии еимыздо ацҳа аргыларатә усурақәа шымҩаҧысуа гәеиҭеит. Аиҳабыра рнапхгаҩы дицын аинфраструктура аминистр Реваз Сохаӡе.

Аиҳабыра рнапхгаҩы Қвешеҭии Кобии еимыздо, 23 километр иҟоу амагистральтә мҩеи аҳапкылҵәеи рҿы имҩаҧгоу, иара убас, уажәазы имҩаҧысуа аусурақәа ибеит.

Апроект аҳәаақәа ирҭагӡаны идыргылоит ҩ-цәаҳәактәи акәатран-бетонтә амҩеи, 5 ацҳаки, 5 ҳапкылҵәаки, иара убас, цҳак еиҭашьақәдыргылоит.

Қвешеҭии Кобии еимыздо амҩатә цыҧҵәаха анаадыртлак ашьҭахь, аӡынраз Коби ахырхарҭала аиҭаҵра мариахоит; аҩхаа иқәынхо 10 раҟара ақыҭақәа руааҧсыра, изакәызаалак уадаҩрак рымамкәа, ирҭаху асервисқәа зегьы рхы иадырхәар рылшоит, аныҟәара шәарҭахом, иаҳа иманшәалахоит.

Аиҭаҵразы акырӡа имаҷны аамҭа аҭаххоит: Қвешеҭи–Коби амҩатә цыҧҵәаха, 1 сааҭк ацынхәрас, 15 минуҭла ахысра ҟалоит; Қарҭынтә Гудауриҟа анеиразы иаҭахыз 2 сааҭк рцынхәрас, ауаа ари ацыҧҵәаха иахысуеит 1 сааҭки 30 минуҭи рыла, Қарҭынтә Степанҵминдаҟа инеир рылшоит 1 сааҭки 45 минуҭи рыла, уаанӡа ари ацыҧҵәаха ахысразы 2 сааҭки  30 минуҭи аҭахын.

Апроект мҩаҧысуеит Азиатәи Аҿиара абанки Аиҭашьақәыргылареи Аҿиареи рзы Европатәи абанки рыцхыраареи аҳәынҭқарратә биуџьет аҟынтә аицфинансыркреи рыла. Зынӡа ари апроект иазоушьҭуп 1.2 миллиард лари. Аргыларатә усурақәа хыркәшахоит етапла,  2025–2026 шықәсқәа рзы.

Қвешеҭии Кобии еимыздо ацҳа аргыларатә усурақәа ргәаҭараан аиҳабыра рнапхгаҩы ицын анагӡаратәи, азакәанҧҵаратәи, аҭыҧантәи мчра ахаҭарнакцәа.