«Иахьатәи Қырҭтәыла –  2013 шықәсатәи Украина акәӡам,  уи зинститутқәа ҕәҕәоу, зымчратә структурақәа ҕәҕәоу ҳәынҭқарроуп, Украина ҭазырхаз асценари араҟа изыҟалом», — иҳәеит Қырҭтәыла аҧыза-министр Иракли Кобахиӡе апрограмма «Имеди LIVE» аефираҿ.

Иракли  Кобахиӡе иҳәамҭала, атәылаҿ амчылареи аҭагылазаашьа аескалациеи зыҟалом.

«Зегьы реиҳа ихадоу — 500ҩык раҟара рҽалархәрала  еиҿкааз амчыларатә ресурс иаҧыхуп, амчыларазы аресурс анумам, ауаа акциахь ианымнеиуа, абри аҩыза аҭагылазаашьаҿы аескалациа аиҿкаара зрылшом.  Сгәы ишаанаго ала, аоппозициа апарламентахь ихынҳәуеит, уаҳа ҧсыхәа рымам. Уи жәабраназ иҟалар ауеит. Раҧхьатәи аилатәараҿы азал иҭәызаауеит әҳа сгәы иаанагоит. Мамзар, дара аполитикатә аҽышьра рықәшәоит. Ахҭысқәа шымҩаҧысуа аабап. Ҳуааҧсыра ак еилыркаароуп, арҭ ауаа, аоппозициатә 4 партиак дара рхала аӡбаракгьы рыдыркылом, изакәызаалак хьыҧшымрак рымам. Дара акоуп иҟарҵо – аҳәаанырцәынтә ироуа адҵақәа нарыгӡоит, уаҳа акгьы, амилаҭтә интересқәа хьаас ирымам», — иҳәеит аҧыза-министр.