«Еиуеиҧшым амзызқәа рымшала аординатура апрограмма изахымсыз, аха, иашьашәалоу апрактикатә усура аҧышәа змоу аҳақьым еиҵбацәа алшара ҿыц рымоуп. Дара,  рхала амедицинатә практика амҩаҧгара алшара рызҭо аттестациатә аҧышәа рҭиир рылшоит», — иҳәеит агәабзиарахьчара аминистр Михаил Сарџьвелаӡе.

Аҧсахрақәа инрықәыршәаны, имаҷу азанааҭқәа рзы аус зуа, адиплом ашьҭахьтәи аквалификациатә аҧышәа зҭихьоу, аординатура апрограммаҿы иарбоу аҿҳәара иалагӡаны аклиникаҿ аус зуа аҳақьым еиҵбацәа,  2026 шықәса жьҭаара 1-нӡа аҳәынҭқарратә аттестациатә аҧышәа иҭины, рхала амедицинатә практика амҩаҧгара иалагар рылшоит.

Агәабзиарахьчара аминистрра имаҷу азанааҭқәа рсиа цәырнагеит:

«Апсихиатриа; арадиациатә онкологиа; ахәыҷтәы агастроентерологиа; апатологиатә анатомиа — аклиникатә патологиа; аиадертә  медицина; акардиохирургиа; анеирохирургиа; анестезиологиеи ареаниматологиеи; анефрологиа; амедицинатә цхыраара лас; ахәыҷтәы амедицинатә цхыраара лас; ахәыҷтәы аинфекциатә чымазарақәа; ахәыҷтәы фтизиатриа-апульмонологиа; ахәыҷтәы  гематологиа/атрансфузиологиа; апластикатәи ареконструктивтәи хирургиа; афизиотерапиа, аиҭашьақәыргылареи акурорттә хәышәтәреи; аревматологиа; аӡбаратә медицина».