Ҳаҧхьаҟа  Русҭавели имҩадуаҿ  имҩаҧысраны иҟоу аиҭашьақәыргыларатә усурақәа  рҳәаақәа ирҭагӡаны, адгьылаҵантәи акоммуникациақәа рыҧсахра инаваргыланы,  ари амҩадуаҿ ахыбрақәагьы дырҽеиуеит.

Қарҭ ахада Каха Калаӡе ари азҵаара далацәажәеит амуниципалтә аиҳабыра иахьатәи реилатәараҿы.

«Ҵыҧхтәи ашықәс анҵәамҭаз,  Қарҭ  2025 шықәсатәи абиуџьет анышьақәҳарҕәҕәоз, Русҭавели имҩаду аиҭашьақәыргылара  зегьы реиҳа зҵакы дуу апроектқәа ишреиу иазгәаҳҭеит. Усҟангьы ибзианы еилаҳкаауан раҧхьа иргыланы адгьылаҵантәи акоммуникациақәа шырҽеитәу.  Иахьазы ақалақь зехьынџьара адгьылаҵантәи аинфраструктура аганахьала апроблемақәа иҟоуп, избанзар, ари аинфраструктура ижәхьеит. Русҭавели имҩаду аҿгьы абри аҩыза апроблема иҟоуп. Аҭҵаарақәа мҩаҧганы, ишеилаҳкааз ала, Русҭавели имҩадуаҿ аӡцарҭақәеи аканализациатә системеи иҟам. Акоммунистцәа рхаан иргылаз авариатә коллектор заҵәык иҟоуп.  Раҧхьа иргыланы, ари аколлектор ирбгатәуп, уи азы аамҭа аҭахуп», — иҳәеит Каха Калаӡе.

Иара ишиҳәаз ала, аханатә, Русҭавели имҩадуаҿ аиҭашьақәыргыларатә усурақәа хымз рыла имҩаҧыргар рҭахын, аха, хыхь иазгәаҭоу апроблемақәа рымшала, иаҳа ирацәаны аамҭа рҭаххоит.

«Убри аҟынтә, сынтәа арҭ аусурақәа ралагара иахәҭам ҳәа иҳаҧхьаӡеит, Русҭавели имҩаду аиҭашьақәыргылара ҳалагоит анеҩстәи ашықәс азы. Раҧхьа иргыланы, амҩатәи адгьылаҵантәи аинфраструктура ҳарҽеиуеит, анеҩс, ахыбрақәа реиҭашьақәыргылареи рырҽеиреи ҳалагоит», — иҳәеит  Каха Калаӡе.