«Шәамахьтәыла Евроеидгыла иалалар аҭахушәа, Қырҭтәыла аҭахымзшәа ирҳәо ииашам, Евроеидгыла Шәамахьтәылеи Қырҭтәылеи еиҧшымкәа ирызныҟәоит, абри ауп иҟалаз», — иҳәеит Қырҭтәыла апарламент актәи авице-спикер Гиа Вольски.

Вольски иажәақәа рыла, лассы-лассы, ахадаратә зҵаарақәа ирыдҳәаланы, Евроеидгыла ииашамкәа Қырҭтәыла иазныҟәоит.

«Иаҳзықәдыргыло аҳәарақәа ҳрыхәаҧшыр,  Қырҭтәыла адәныҟатәи аполитика аганахьала абзарбзантә ҟашәа ароль ахь ишыладырҟәуа убарҭоуп. Иаҳҳәап, аекономикатә ма арратә ганахьала Урыстәыла аҿагылара азҵаараҿы.

Шәамахьтәылагьы Қырҭтәылагьы, еиҟараны, Евроеидгыла алалара иазҿлымҳауп. Уи аамҭазы, Қырҭтәыла иаҳа ирацәаны арбага бзиақәа амоуп, европатәи астандартқәа иаҳа ирышьашәалоуп.

Ҳара Шәамахьтәыла ақәҿиарақәа азеиҕьаҳшьоит. Ҳара еиҧҟьарада аус еицаауеит. Евроеидгыла алалара аганахьала ҳҽазышәарақәа еиҧшуп, аха, Бриуссель аконкреттә интересқәа рымоуп, дара ринтересқәа Қырҭтәыла астратегиатә интересқәа ирышьашәалам», — иҳәеит  Гиа Вольски.