«Иахьа Қырҭтәыла иахәаша агеополитикатә ҭагылазаашьа иҟоуп: арегионаҿ Урыстәыла анырра ҧсыҽхеит, Америка Аахыҵ Кавказахь иаанарҧшу азҿлымҳара азҳауеит, ашәарҭадара аусхкы аҿы атранзиттә проектқәа Қырҭтәыла алшара ду арҭоит мраҭашәаратә астратегиатә архитектураҿы зҵакы дуу  аҭыҧ аанкыларазы», — иануп  «Аоппозициаа ралианс» алахәылацәа  Гига Бокериеи, Гиги Ҵереҭелии, Зураб Џьаҧариӡеи еицыҟарҵаз аҳәамҭаҿы.

Аҳәамҭаҿы ишазгәаҭоу ала,  «Трамп имаршрут» арегионаҿ ашәарҭадареи, мышхәыбзазареи, аҭынчреи еиқәнаршәоит.

«Аҭоурыхтә ҵакы змоу абри аамҭазы  „Ақырҭуа гәахәтәы“ Қырҭтәыла аинтересқәа ракәымкәа, Биӡина Иванишвили ирежим аинтересқәа ирықәныҟәоит. Қырҭтәылеи ақырҭуа жәлари ринтересқәеи Америка аинтересқәеи еиҧшуп, аха,  атәыла аҩныҵҟа иҟоу Америка аҿагылаҩцәа – Ирани, Китаии, Урыстәылеи рнырра аизырҳареи  мраҭашәара иадгыло аполитикатәи атәылауаҩратәи мчқәа рышьҭацалареи аан   арҭ аинтересқәа зынагӡахом.

Алианс апозициа еилкаауп – Қырҭтәыла  аимадареи, ашәарҭадареи, атранзити арегионалтә архитектура иалахәызароуп.  TRIPP – Шәамахьтәылеи Азербаиџьани мацара ракәымкәа, Аахыҵ Кавказ зегьы зҵакы дуу алшара азцәырнагоит. Қырҭтәыла амилаҭтә интересқәа иазҧхьагәаҭаны, арегионаҿ америкатә аекономикатәи, атранзиттәи, ахыхьчаратәи интерес азҳара ианаҿу, ҳтәыла абарҭ апроцессқәа рынҭыҵ иаанхар ҟалом.

Биӡина Иванишвили Америкаҟны аизыҟазаашьақәа реиҭашьақәыргылара иҭахыҵәҟьазар, иара Рубио иҳәамҭаҿы иарбоу ашьаҿақәа ҟаиҵароуп.

Актәи –  ирантәии, урыстәылатәии, китаитәии анырра ирмаҷроуп.

Аҩбатәи – мраҭашәареи Америкеи ирҿагыло ариторика мап ацәикроуп. Биӡина ипропагандатә машьына есымша Америка ахаҭарнакцәеи, Евроеидгылеи, европатәи атәылақәеи иржәылозар,  Вашингтон аҟны апартниорра зышьақәгылом.

Ахҧатәи –  аполитикатә баандаҩцәа иоужьҭны, аполитикатә ашьҭацалара иаҟәыҵроуп. Мраҭашәара иадгыло аоппозициеи, активистцәеи, ажурналистцәеи, атәылауаҩратә уаажәларра алидерцәеи рзы ихьацырку аусқәа аанкылатәуп.

Аҧшьбатәи –  арепрессиатә закәанқәа  — агрантқәа ирызку азакәани, атәым финансыркра аҧкреи, аизарақәеи агәаанагара аарҧшреи ахақәиҭра иаҧырхагоу анормақәеи аҧыхтәуп.

Ахәбатәи – еиҿкаау амчыларатә гәыҧқәа аҧыхтәуп», — иануп аҳәамҭаҿы.

«Аоппозициаа ралианс» аҳәамҭа ишану ала, Америкеи Европеи ирыдгыло аиҿкаарақәа ианрышьҭацало аамҭазы, Иран иадҳәалоу арелигиатәи, аидеологиатәи, аинформациатәи аҳақәа Қырҭтәыла аҵакырадгьылаҿ уадаҩрада аус руеит.

«Алианс ҳасабтәс иамоуп ақырҭуа жәлар рреалтә интересқәа рыхьчара: зхы иақәиҭу алхрақәа рымҩаҧгареи, аполитбаандаҩцәа рхақәиҭтәреи, арепрессиатә закәанқәа раҧыхреи, мраҭашәаратә партниорра азыхынҳәреи.

Ҳара аҭышәынтәалара ҳҭахуп, аха, ахақәиҭра ахәаҽра ахарџьла акәымкәа, Америкаҟны апартниорра ҳҭахуп, аха, Америка аҩызцәа ирҿагыло арежим ала акәымкәа.

Алианс хықәкыс иамоуп Қырҭтәыла ауааҧсыра алхра азин рзыхынҳәреи аҳәынҭқарра  — мраҭашәаратә ахырхарҭа азыхынҳәреи», — иануп аҳәамҭаҿы.