Америка ахада Дональд Трамп иҳәамҭала, анеҩстәи ҩымчыбжь рзы  Владимир Путин диҧылар ҟалап.

Трамп ари аҳәамҭа ҟаиҵеит Аҩны шкәакәаҿ. Иара иажәақәа рыла, атәылақәа рхадацәа реиҧыларанӡа, ҩ-тәылак рдәныҟатәи аусқәа рминистрцәа  — Марко Рубиои Сергеи Лаврови аиҿцәажәарақәа мҩаҧыргоит.

Иара убас, Трамп ишиҳәаз ала, Владимир Зеленски даниҧыло, Путини иареи ҭелла излацәажәаз азҵаарақәагьы дырзааҭгылоит.

«Ҳара проблемак ҳамоуп  — дара изеиқәшаҳаҭхом. Реизыҟазаашьақәа даараӡа ицәгьоуп», — иҳәеит Трамп.

Уи адагьы, Трамп иазхеиҵеит Путини  иареи рхатә еизыҟазаашьақәа рыбзоурала урыстәыла-украинатәи аимак аҭыҧқәҵара иаҳа имариахоит ҳәа игәы ишаанагоз. Насгьы, ишиҳәаз ала, хара ихысуа аракетақәа  «Томагавк» Украина аҭара аперспектива ҽакала дахәаҧшуеит.

«Ҳара ҳхаҭагьы  „Томагавкқәа“ ҳҭахуп  —  арҭ аракетақәа ирацәаны иҳамоуп, аха, ҳаргьы хымҧада иаҳҭахуп. Ари аганахьала иҟаҳҵаша сыздырӡом», — иҳәеит Трамп.