Қырҭтәыла Адәныҟатәи аусқәа рминистрра аинформациа инақәыршәаны,  Аусеицуреи Ашәарҭадареи рзы Европатәи Аиҿкаара еснагьтәи ахеилак аҿы  2008 шықәсатәи Урыстәыла–Қырҭтәылатәи еибашьра аилгара инаркны 17 шықәса аҵра иалацәажәеит.

Аминистрра адыррала, аилатәараҿы дықәгылеит Қырҭтәыла адәныҟатәи аусқәа рминистр лхаҭыҧуаҩ Лаша Дарсалиа. Иара Қырҭтәыла импыҵахалоу аҵакырадгьылқәа рҿы ашәарҭадареи ауаҩы изинқәеи рганахьала иҟоу аҭагылазаашьа цәгьа далацәажәеит. Иара убас, Қырҭтәыла аҭынчратә политикагьы дазааҭгылеит.

Аусеицуреи Ашәарҭадареи рзы Европатәи Аиҿкаараҿы иҟоу  Қырҭтәыла ахьыҧшымреи аҵакырадгьылтә акзаареи иадгыло аиҩызаратә гәыҧ Қырҭтәыла адгыларатә ҳәамҭа ҟарҵеит.

Қырҭтәыла Адәныҟатәи аусқәа рминистрра аинформациала, аҳәамҭаҿы иаҵшьны иазгәаҭоуп    Аусеицуреи Ашәарҭадареи рзы Европатәи Аиҿкаара Қырҭтәыла ахьыҧшымреи аҵакырадгьылтә акзаареи ишадгыло.

Иара убас, аҳәамҭаҿы Урыстәылахь ааҧхьара ҟаҵоуп 2008 шықәса нанҳәа 12 рзы амца аанкылара иазкны аганқәа еицрыдыркылаз аиқәшаҳаҭра нагӡаны, ахатә бџьармчқәа импыҵахаоу аҵакырадгьылқәа рҟынтә иалыргарц, Аҧсни Цхинвалтәи арегиони рхьыҧшымра азхаҵара иазку аӡбара иаҧырхырц.

Аҳәамҭа анҵәамҭазы иаҵшьны иазгәаҭан Аинцидентқәа рпревенциеи рықәҿыҭреи амеханизм аҳәаақәа ирҭагӡаны имҩаҧысуа  аиҧыларақәа рҵакы. Аиҩызаратә гәыҧ алахәылацәа рҳәамҭала, ари амеханизм аҳәаақәа ирҭагӡаны Гал имҩаҧысуаз аиҧыларақәагьы хымҧада еиҭашьақәыргылазароуп.