Шида Қарҭли аполициаҿы аусеилыргара мҩаҧысуеит Урыстәыла Ашьауҕатә закәанеидкыла  143-тәи ахәҭаҷ ала, Урыстәыла атәылауаҩ Р.Ш. ибжьаӡра афакт азы. Ари атәы иануп Қырҭтәыла Аҩныҵҟатәи аусқәа рминистрра аҳәамҭаҿы.

«Азинхьчаратә органқәа русзуҩцәа дырра анроуҵәҟьа, зыҧшра ҟамҵакәа, иашьашәалоу ауснагӡатәқәа мҩаҧыргеит, зыӡбахәы ҳәоу азҵааразы изакәызаалак информациак адырра зылшоз ауаа зегьы рҿахәы рҿырхит.

Иара убас, авидеоацклаҧшратә камерақәа рынҵамҭақәа гәарҭеит, уаҟа ишубарҭаоу ала, жьҭаара 12 рзы Урыстәыла атәылауаҩ, иара  дахьынхоз Гори ақалақь далҵны, атакси дақәтәаны, Кирбали ақыҭанӡа днеит.

Атакси арныҟәцаҩи аҭыҧантәи ауааҧсыреи ишырҳәаз ала,  зыӡбахәы ҳәоу ауаҩҧсы, атакси дҭыҵны, ампыҵахалатә цәаҳәа дахысын, ихатә гәаҧхарала импыҵахалоу аҵакырадгьылахь днеит», — иануп Аҩныҵҟатәи аусқәа рминистрра аҳәамҭаҿы.