Ҭырқәтәыла ахада Реџьеп Таип  Ердоҕан  Михаила Ҟавелашвили Қырҭтәыла ахадас иалхра идиныҳәалеит.

Адныҳәаларатә шәҟәы аҟны Ердоҕан ишазгәеиҭаз ала, иара агәра ганы дыҟоуп  атәылақәа рыбжьара ҩ-ганктәи аизыҟазаашьақәеи аусеицура ҕәҕәеит наҟ-наҟгьы аҿиара шынарыгӡо.

«Ҳаҭыр зқәу ҿыц иалху ахада, хаҭала сареи аҭырқәа жәлари ҳахьӡала Қырҭтәыла ахадас шәалхра шәыдысныҳәалоит. Ҳареи Қырҭтәылеи аигәалареи астратегиатә партниорреи ҳабжьоуп.  Аҳаҭыртә ҧхықәра анагӡараҿы ақәҿиарақәа шәзеиҕьасшьоит. Агәра ганы сыҟоуп шәпрезидентраан ҳаиҩызаратә еизыҟазаашьақәеи ҳусеицуреи арҕәҕәара шынаҳагӡо, уи ҳтәылақәа мацара ракәымкәа, арегион зегьы хырҳагара азаанагоит. Агәабзиареи мышхәыбзазареи  шәзеиҕьасшьоит, ақырҭуа жәлар  — аиҭаҿиареи аҧеиҧш лашеи», —  иануп Ердоҕан ишәҟәы аҟны, уи иаланарҵәеит «Ақырҭуа гәахәтәы» апресс-маҵзура.