Қырҭтәыла аҧыза-министр Иракли Кобахиӡе аофициалтә визитла Қырҭтәыла иаҭааиз Шәамахьтәыла ахада Ваагн Хачатуриан диҧылеит.  

Ишиашо аформатаҿ имҩаҧгаз аиҧылараҿы хшыҩзышьҭра рызун Қырҭтәылеи Шәамахьтәылеи акыршықәсатәи реигәыларатә еизыҟазаашьақәеи  астратегиатә партниорра аҿиараҿы иҟоу адинамика бзиеи. Иаҵшьны иазгәаҭан арегионаҿ аҭынчреи аҭышәынтәалареи рҵакы ҷыда. Иракли Кобахиӡе Ваагн Хачатуриан Қырҭтәыла ивизити адгылара ҕәҕеи азыҳәан ҭабуп ҳәа иеиҳәеит.  

„Гәахәарала иазгәасҭар сҭахуп ҳтәылақәа реизыҟазаашьақәа рҿиара адинамика даараӡа ишыбзиоу. Ҳәарада, уи убарҭоуп лассы-лассы имҩаҧысуа, зыҩаӡара ҳараку аиҧныҧсахларатә визитқәа рылагьы.  Қырҭтәыла шәахьаҭааиз азыҳәан ҭабуп ҳәа шәасҳәоит, хаҭала шәара шәҟынтә иҳамоу адгылара аҵакы ду амоуп. Ҳаизыҟазаашьақәа қәҿиарала аҿиара иаҿуп, аполитикатәи, аекономикатәи, егьырҭгьи аусхкқәа рҿы. Шәамахьтәыла аиҳабыреи ҳареи активла аус еицаауеит. Агәра ганы сыҟоуп абри адинамикеи, абри аласреи рыла, ҳаҧхьаҟа ҳаизыҟазаашьақәа иаҳа рырҭбаара шҳалшо“, – иҳәеит Иракли Кобахиӡе.  

Шәамахьтәылатәи ареспублика ахада Қырҭтәыла анапхгара гәыкала идкыларазы ҭабуп ҳәа реиҳәеит. Ваагн Хачатуриан ҩ-ганктәи аизыҟазаашьақәа иаҳа рырҭбаара азҵаара дазааҭгылеит.   

„Қырҭтәыла анапхгара гәыкала сахьрыдыркылаз азыҳәан ҭабуп ҳәа расҳәоит. Иацы сааит, аха, еснагь абра сыҟазшәа сгәы иабоит. Уи ҷыдала ҳазныҟәареи араҟа иаҳзеиҿкааз алагылазаареи ирыбзоуроуп. Иара убас, агәра ганы сыҟоуп, абри зегьы ҳтәыла аҧыза- министри шәареи шәеизыҟазаашьақәеи, игәрагоу апартниорреи ишрыбзоуроу. Зыҩаӡара ҳараку аиҧыларақәа абарҭ аизыҟазаашьақәа иаҳа идырҕәҕәоит, алшара ҿыцқәа ҳазцәырнагоит. Ҳара ҩ-ганктәи аизыҟазаашьақәа рырҕәҕәаразы иҳалшо зегьы ҟаҳҵоит. Агәра шәсыргар сҭахуп ашәамахь аган ирымоу абри азнеишьаҿы  изакәызаалак аиҭакрак шыҟамло. Шәареи ҳареи арегионаҿ аҭынчреи аҭышәынтәалареи иҟазар ҳҭахуп. Шәамахьтәыла иҟоугьы Қырҭтәыла иҟоугьы ҳуааҧсыра ҳтәылақәа рхьыҧшымреи рҵакырадгьылтә акзаареи рырҕәҕәара иазку ҳаиҳабырақәа рҽазышәарақәа ирзыразуп ҳәа сгәы иаанагоит“, – иҳәеит Ваагн Хачатуриан.  

Ишиашо аформатаҿ имҩаҧгаз аиҧылара ашьҭахь, Қырҭтәыла аҧыза-министри аиҳабыра алахәылацәеи Шәамахьтәыла ахадеи иделегациеи аофициалтә шьыбжьхьаҿы ирыдыркылеит.