Қырҭтәыла аҧыза-министр Иракли Кобахиӡе жәларбжьаратәи амшынтә аиҿкаара  (IMO) амаӡаныҟәгаҩ хада диҧылеит.

Аганқәа рхаҭарнакцәа Қырҭтәылеи IMO-и рыбжьара акыршықәса ирылагӡаны, қәҿиарала имҩаҧысуа аусеицуреи атәыла амшынтә усхкы арҕәҕәара амзызла наҟ-наҟ апартниорра арҭбааразы иҟоу алшарақәеи ирылацәажәеит.

Хшыҩзышьҭра азун Анаклиатәи абаҕәаза аргылара апроекти атәыла иҭышәынтәалоу аекономикатә аҿиаразы уи иамоу аҵаки. Аҧыза-министр ишазгәеиҭаз ала, Қырҭтәыла аиҳабыра амшынтә индустриа аҿиара ҷыдала иазҿлымҳауп.

Жәларбжьаратәи амшынтә аиҿкаара амаӡаныҟәгаҩ хада иаҵшьны иазгәеиҭеит асервисқәа рдиџьитализациа аганахьала Қырҭтәыла иамоу  ақәҿиарақәа, уи атәылаҿ амшынтә сектор аҿиара иацхраауеит. Иара ишиҳәаз ала, Қырҭтәыла, ари аганахьала, егьырҭ атәылақәа рзы иҿырҧшыгазароуп.

Аиҧылара алахәылацәа ишазгәарҭаз ала, дара наҟ-наҟгьы аусеицура анагӡара иазыхиоуп, ақырҭуа амшынуаа рквалификациа ашьҭыхра ахырхарҭалагьы.