Жәашықәса раҧхьа Ашьапылампыл азы афедерациа анапхгара ҿыц ашьапылампыл аҿиара аус рнапы адыркит, дара роуп изыбзоуроу аҵыхәтәантәи ашықәсқәа рзы ақырҭуа шьапылампыл иамоу ақәҿиара дуқәа,  – иҳәеит Қырҭтәыла аҧыза-министр Иракли Кобахиӡе ашьапылампыласҩцәа анашьамҭақәа рыҭара ацеремониаҿы данықәгылоз.

Аиҳабыра рнапхгаҩы ақырҭуа шьапылампыл ақәҿиарақәа дырзааҭгылан, ишиҳәаз ала, абарҭ ақәҿиарақәа еишьҭаргыланы иҟаҵаз ашьаҿақәа ирыбзоуроуп.

“Ҳмилаҭтә аизга В агәыҧаҿ аҭыҧ ааннакылеит, уи ашьапылампыл аҿиаразы аҵакы ду аман. Аҿартә аизгагьы ақәҿиара дуқәа аиуит. Аиашаз, иуадаҩӡоу агәыҧ аҟынтә Европа ачемпионатахь аиасразы минуҭқәак рыгхеит.  Иара убас, афуҭзалгьы инеишьҭаргыланы иҩынтәны Европа ачемпионатахь ииасит. Ари ақәҿиарагьы даараӡа идууп. Ҳшьапылампыласҩцәа, ҳаеҵәақәа хаҭалатәи аихьӡарақәагьы рыман. Ҷыдала далкаатәуп Хвича Кварацхелиа, сынтәа иара аиааирақәа зегьы игеит. Оҭар Китеишвилигьы далыскаар сҭахуп, иара инеишьҭаргыланы иҩынтәны Австриатәи бундеслига иреиҕьу ахәмарҩыс дҟалеит. Гьаргь Мамардашвили Ливерпуль аҿы идебиут мҩаҧысит. Абарҭ ахьӡарақәа даараӡа идууп, абри аҩызаҵәҟьа ақәҿиарақәа заур зҭаху ҳхәыҷқәа рзы иҿырҧшыгоуп”, – иҳәеит Иракли Кобахиӡе.

Аиҳабыра рнапхгаҩы ақырҭуа шьапылампыл иамоу ақәҿиарақәа рҿы Леван Кобиашвилии афедерациеи иҟарҵаз алагала ду азгәаҭаны, ҭабуп ҳәа реиҳәеит.

“Сара схаҭа избеит дара ари аус гәыкала ишыҟарҵоз. Гәыкала, абзиабарала  аус аныҟауҵо ауп ақәҿиара  аныҟало, араагьы дара ақырҭуа шьапылампылахь ирымоу абзиабара зегьы ари аус иаларҵеит. Раҧхьа иргыланы, уи Леван Кобиашвилии игәыҧи ирыбзоуроуп, уи азыҳәан рызынтәгьы ҭабуп ҳәа расҳәоит“, – иҳәеит аҧыза-министр.

Иракли Кобахиӡе аспорттә инфраструктура аҿиара ахырхарҭала Қырҭтәыла аиҳабыра ирымоу апланқәа дырзааҭгылан, ишиҳәаз ала, ари ахырхарҭа аҧара рацәа алаҵара ргәы иҭоуп.

„30 атехникатә стадионқәа рыргылара ҳалагоит, урҭ рҟынтә 23 рыргылара хыркәшахоит анеҩстәи ашықәс азы, иара убас,  8 қалақьк рҿы астадион дуқәа ҳаргылоит, абри зегьы, ганкахьала, ахәыҷтәы шьапылампыл аҿиара иацхраауеит, егьи аганахьала – ҳмилаҭтә чемпионат иаҳа аҿиара амазаауеит. Ашьапылампыл аҿиаразы иаҭаху зегьы ҟаҳҵоит. Ахәыҷқәа ари аспорт даараӡа иазҿлымҳауп, ашьапылампыласра рҭахуп, аха, лассы-лассы иашьашәалоу аинфраструктура аҟамзаара рҧырхагоуп. Аспорттә инфраструктура иаҳа-иаҳа иазҳауа аҭахрақәа ирышьашәалазар ҳҭахуп, излауа ала ирацәаны ақырҭуа хәыҷқәа ашьапылампыласра алшара рымазарц азыҳәан,  уи ауп хықәкыс иҳамоу. Уи аспорттә қәҿиарақәа мацара ракәӡам изызку, уи гәабзиароуп, уи изҩыдоу аҧсҭазаашьоуп, ҳхылҵи игыло абиҧарақәеи абри аҵасла инхалароуп”, – иҳәеит аҧыза-министр.

Аиҳабыра рнапхгаҩы ашьапылампыласҩцәеи ашьапылампыл аҿиара аус аҿы алагала ҟазҵо ауааҧсыреи ҭабуп ҳәа раҳәаны, иаҵшьны иазгәеиҭеит азгәыбылҩцәагьы аҵакы ду шрымоу.

“Иара убас, азгәыбылҩцәагьы сырзааҭгылар сҭахуп, дара аиааираангьы аҵахараангьы еснагь ақырҭуа шьапылампыли ҳшьапылампыласҩцәеи ирыдгылоуп. Аиааираангьы аҵахараангьы аҵыхәанӡа ҳшьапылампыласҩцәа рыдгылара иаҵанакуа рацәоуп. Уи ада ашьапылампыл аҿиара заиуам, ари адгылара ҳшьапылампыласҩцәа гәызҭаҵагас ирзыҟалоит ҳаҧхьаҟа иаҳа идуу ақәҿиарақәа раиуразы. Убри аҟынтә, ҳшьапылампыласҩцәа, ҳаизга, ҳкомандақәа аҵыхәанӡа ирыдгылаз азгәыбылҩцәа зегьы ҷыдала ҭабуп ҳәа расҳәоит. Мышқәак рышьҭахь 2026 шықәса ҳҭагылоит, агәра ганы сыҟоуп 2026 шықәса ақырҭуа шьапылампыл ақәҿиара дуқәа шазаанаго“, – иҳәеит Иракли Кобахиӡе.

Анашьамҭаҭара ацеремониа ааиртит ашьапылампыл азы афедерациа ахада Леван Кобиашвили. Аусмҩаҧгатә аҿы иқәгылеит Қарҭ ахада Каха Калаӡеи аспорт азы аминистр Шьалуа Гоголаӡеи.