Иракли Кобахиӡе анапхгара ззиуа аиҳабыратә координациатә комиссиа афатәаалыҵи ахәшәқәеи  мацара акәымкәа, абылтәы ахәқәагьы рызҵаарақәа рзы аус ауеит. Ари аӡбара рыдыркылеит иахьа аиҳабыра радминистрациаҿы имҩаҧгаз акомиссиа актәи аилатәараҿы.

Аиҳабыра радминистрациа адыррақәа рыла, акомиссиа алахәылацәа анеҩстәи амчыбжьқәа рзы имҩаҧыргараны иҟоу ауснагӡатәқәа рплан иалацәажәеит. Лымкаала,  дара ааглыхыҩцәеи, еиуеиҧшым ахәаахәҭратә аҳақәеи адистрибуциатә еилахәырақәеи  рхаҭарнакцәеи ирҧылоит. Аиҳабыратә комиссиа иашьашәалоу апарламенттә комиссиаҟны еиқәшаҳаҭны аус ауеит, дара  русура хдыркәшараны иҟоуп мшаҧы анҵәамҭаз.

Аиҳабыратә комиссиа иалоуп аекономикеи иҭышәынтәалоу аҿиареи рзы аминистр Мариам Ҟвривишвилии, аҧсабаратә лагылазаареи ақыҭанхамҩеи рзы аминистр Давиҭ Сонҕулашвилии, агәабзиарахьчара аминистр  Михаил Сарџьвелаӡеи, афинансқәа рминистр  Лаша Хуцишвилии, Аҳәынҭқарратә шәарҭадара амаҵзура аиҳабы  Мамука Мдинараӡеи, аиҳабыра радминистрациа анапхгаҩы Леван Жоржолиании, Аконкуренциеи ахархәаҩцәа рзинқәа рыхьчареи агентра ахантәаҩы  Иракли Леквинаӡеи.