Евроеидгыла Венесуела имҩаҧысуа апроцессқәа ирыдҳәаланы аҳәамҭа аланарҵәеит.

Аҳәамҭа ишану ала, венесуелатәи ажәлар рхатә ҧеиҧш аҳәаақәҵаразы ирымоу азин ихьчазароуп. Адокумент иадгылеит Евроеидгыла иалоу 26 ҳәынҭқаррақәа. Аҳәамҭа иадымгылеит аҳәанҭқарра заҵәык — Венгриа.

«Евроеидгыла аганқәа зегьы рахь ааҧхьара ҟанаҵоит рҽырҭынчны, аескалациа аҽацәыхьчаразы ари акризис аҭынчмҩала аҭыҧ иқәырҵарц. Евроеидгыла даҽазнык иаҵшьны иазгәанаҭоит жәларбжьаратәи азини ЕАР аҧҟанҵеи хымҧада ишыхьчатәу. Европатәи ахеилак изныкымкәа аанацҳахьеит Николас Мадуро адемократиатә мҩала иалху ахада алегитимра шиам, Евроеидгыла Венесуела аҭынчратә аиасратә период иадгылоит, атәыла ахьыҧшымра пату ақәҵаны. Венесуелатәи ажәлар рхатә ҧеиҧш аҳәаақәҵаразы ирымоу азин ихьчазароуп.

Евроеидгыла атрансмилаҭтә еиҿкаау ацәгьауреи азакәандаратә анаркотикқәа реикәшареи  аҿагылара аҧыжәара шамоу иазханаҵоит. Аха, аамҭакала иаҵшьны иазгәаҳҭоит абарҭ апроблемақәа шыӡбатәу жәларбжьаратәи азини аҵакырадгьылтә акзаареи асуверинитети  апринципқәа рышьаҭала», — иануп аҳәамҭаҿы.

Иара убас, аҳәамҭа ишану ала, Евроеидгыла, ари акризис аиҿцәажәарақәа рыла аҭыҧқәҵара амзызла, Америкаҟны еиҧҟьарада аимадара амоуп.