Қырҭтәыла Аҩныҵҟатәи аусқәа рминистрреи ҭырқәтәылатәи аколлегацәеи еицымҩаҧыргаз аусмҩаҧгатәқәа рыбзоурала, Ҭырқәтәыла азинхьчаратә органқәа изышьҭаз 12ҩык аанкылоуп. Иахьатәи абрифинг аҿы ари атәы ааицҳаит Акриминалтә полициа хада адепартамент  адиректор ихаҭыҧуаҩ Иракли Дондолаӡе.

«Аҵыхәтәантәи 24 сааҭ рыла Қырҭтәыла аҵакырадгьылаҿ имҩаҧгаз аоперативтә усмҩаҧгатәқәа ирызкны аинформациа шәаҳҭар ҳҭахуп. Қырҭтәыла Аҩныҵҟатәи аусқәа рминистрреи ҭырқәтәылатәи аколлегацәеи еицымҩаҧыргаз аусмҩаҧгатәқәа рыбзоурала, Ҭырқәтәыла азинхьчаратә органқәа изышьҭаз 12ҩык аанкылоуп. Аусеилыргараан ишеилкаахаз ала, 12ҩык рҟынтә ааҩык Қырҭтәылаҟа иааит дара рзы жәларбжьратәи аҧшаара иалагаанӡа, егьырҭ ҧшьҩык закәандарала Қырҭтәылаҟа иааит, дара ирыдҳәаланы ашьауҕатә-азинтә процедурақәа мҩаҧысуеит. Зыӡбахәы ҳәоу ауаа ихьанҭаӡоу ацәгьаурақәа рзы ахара рыдуп, лымкаала, хықәкыла ауаҩшьра (ахәыҷы ишьрагьы) , ашьра аҽазкра, бџьарла ақәлара, ауаҩы закәандарала ихақәиҭра аҧкра, ацәгьауратә гәыҧ аиҿкаареи алахәызаареи, закәандарала амцабџьар аахәареи ахархәареи, анаркоацәгьаурақәа, адокументқәа рҧаршеира уҳәа, зынӡа 178 аепизодқәа рзы ахара рыдуп.

Иахьа абра иҟоу ҭырқәтәылатәи ҳколлегацәа ҭабуп ҳәа расҳәар сҭахуп.  Ҳара акыршықәса ирылагӡаны қәҿиарала аус еицаауеит, уи шьақәнарҕәҕәоит  қәҿиарала еицымҩаҧаагаз уажәтәи аполициатә операциагьы», — иҳәеит  Иракли Дондолаӡе.