Қырҭтәыла аҧыза-министр Иракли Кобахиӡе Қырҭтәылеи, Азербаиџьани, Ҭырқәтәылеи иҟоу BP арегионалтә директор Гари Џьонс диҧылеит. 

Аиҧылара алахәылацәа акыршықәса ирылагӡаны BP-и Қырҭтәылеи рыбжьара қәҿиарала имҩаҧысуа аусеицура иалацәажәеит. Ишазгәаҭаз ала,  BP Қырҭтәылазы  идуӡӡоу аинвесторцәа иреиуп, атәыла ахырҳагара ду азаанагоит, аусуратә ҭыҧқәа раҧҵареи ауаажәларратә усхкы аҿы аинвестициатә программақәа рымҩаҧгареи аганахьалагьы. 

Аиҧылараҿы BP Қырҭтәылаҿ имҩаҧнаго апроектқәа рҵакы иазааҭгылеит, ҷыдала иазгәаҭан Қырҭтәыла аҵакырадгьыл иалсны ицо анефҭи агази мҩанызго, атранзиттә 3 мҩангагаки, иара убас, Бақәа-Суҧса амҩангагеи Бақәа -Қарҭ -Џьеиҳан анефҭмҩангагеи рҵакы. 

Иара убас, ҷыдала иазгәаҭан Аахыҵ Кавказтәи амҩангага апроект (SCP) ароль, ари амҩангага ала Шаҳ Дениз ахыҵҵырҭа аҟынтә аҧсабаратә газ Азербаиџьани, Қырҭтәылеи, Ҭырқәтәылеи рџьармыкьақәа рахь инаргоит. 

Аиҧылараҿы иаҵшьны иазгәаҭан Қырҭтәыла еиқәыршәоу, иманшәалоу аинвестициатә лагылазаареи, атәыла атранзиттә функциеи, иара убас, BP-и Қырҭтәылеи рпартниорра иаҳа арҭбааразы иҟоу алшарақәеи.  

Аиҧылара рхы аладырхәит Қырҭтәыла аекономикеи иҭышәынтәалоу аҿиареи рзы аминистр Мариам Қвривишвилии аиҳабыра радминистрациа аиҳабы Леван Жоржолиании.