Сара зегьы ирыбжьазгоит апровокациақәа рҽаладмырхәыкәа,  аҭынчратә протестқәа нарыгӡарц, — илҩит Қырҭтәыла ҧасатәи ахада Саломе Зурабишвили асоциалтә аҳаҿы.

Лара лҳәамҭала,  абри аҩыза апровокациақәа апротестқәа раҟәыҵроуп изызку.

«Ҳара аҳәынҭқарратә институтқәа рганахьала иарбазаалак ақәлара ҳақәыӡбоит. Иахьа иаабаз ахҭысқәа ибзианы иаадырҧшуеит ҳара имҩаҧааго аҭынчратә протестқәа арежим ишаргәамҵуа. Абри аҩыза апровокациақәа апротест аҟәыҵроуп изызку.

Сара аҭынчратә протестқәа срыдгылоит. Зегьы ирыбжьазгоит апровокациақәа рҽаладмырхәыкәа,  аҭынчратә протестқәа нарыгӡарц, избанзар, аҭынчмҩа мацаралоуп ҳара ҳхықәкы анагӡара шҳалшо», — илҩит  Зурабишвили.

Аҩныҵҟатәи аусқәа рминистрра адыррақәа рыла, иахьа ашырҧаз, акаолициа  «Лело —  Қырҭтәыла ҕәҕәа» алидерцәа иреиу  Алеко Елисашвили Қарҭ ақалақьтә аӡбарҭа аусмҩаҧгарҭа ахыбра амца ацреиҵар иҭахын.