Польшатәи Сеим Михаил Саакашвили изҵааразы арезолиуциа аднакылеит
Польшатәи Сеим Михаил Саакашвили изҵааразы арезолиуциа аднакылеит

Польшатәи Сеим Михаил Саакашвили изҵааразы арезолиуциа аднакылеит. Адокумент аҿы  жәларбжьаратәи ауаажәларра рахь ааҧхьара ҟаҵоуп Қырҭтәыла ҧасатәи ахада Михаил Саакашвили иәгабзиареи иҧсҭазаареи еиқәдырхарц.

Ари аинформациа аладырҵәеит польшатәи АИХ.

Арезолиуциаҿы Қырҭтәыла анапхгара рахь ааҧхьара ҟаҵоуп Михаил Саакашвили зыҧшра ҟамҵакәа алшара ирҭарц иахәҭоу ахәышәтәра аиуразы.

Арезолиуциа апроект цәырыргеит Сеим апрезидиум. Адокумент иадгылеит 438ҩык адепутатцәа, 8ҩык иақәшаҳаҭымхеит, аӡәы иҽааникылеит.

Адепутатцәа ишазгәарҭаз  ала,  дара ирымоу аинформациа инақәыршәаны, Михаил Саакашвили цәгьала дыҟоуп, имоу амедицинатә диагнозқәа рылагьы иубарҭоуп игәабзиара аҭагылазаашьа акырӡа ишеицәахаз. Адокумент аҿы ишазгәаҭоу ала, аҳақьым ибжьгарала, Михаил Саакашвили зыҧшра ҟамҵакәа ахәышәтәра ҷыда изымҩаҧгатәуп, аха, иахәҭоу амедицинатә усбарҭақәа рыҟамзаара амшала Қырҭтәыла абри аҩыза ахәышәтәра рзымҩаҧыргом.

Польшатәи аполитикцәа ишазгәарҭаз  ала, Саакашвили алагала ду ҟаиҵеит ақырҭуаа рыгәҭа европатәи апринципқәа раларҵәараҿы, уи иабзоуроуп  Евроеидгыла алалара амзызла 2022 шықәсазы Қырҭтәыла анапхгара иҟарҵаз азыҳәамҭагьы.

Иара убас, арезолиуциа ишану ала, Саакашвили аргама ааицҳаит аҽыхәшәтәреи аиҭашьақәыргылара наӡеи ашьҭахь, иара атәылашҟа ахынҳәреи иусӡбаратә процесс аҽалархәреи дшазыхиоу.