Апарламенттә аиҳара алидер  Мамуки Мдинараӡе иҳәамҭала, «Ақырҭуа гәахәтәы» америкатә  FARA  уажәтәи аредакциа ахҩылаа хаҭаҵәҟьа азакәанпроект цәыраагоит.

«Ишыжәдыруа еиҧш, Америка аиҳабыра ҿыц  иазхарҵеит америкатә финансқәа еиуеиҧшым атәылақәа рҿы, Қырҭтәылагьы, аилаҩынтәреи ареволиуциатә процессқәеи рыдгыларазы ахархәара шрымаз.  Ҵыҧх апарламент FARA аверсиа аднакылеит, аха, уи инаӡаны ахархәара амоуӡацт. Иара убас, ишыжәдыруа еиҧш, ари азакәан амч шаиузгьы, аҳәаанырцәынтә аҧара зауа, зегьы реиҳа ибеиу, идуу иҳәынҭқарратәым аиҿкаарақәа ареестр аҿы ашәҟәы иҭагалам. Убри аҟынтә, ҳара  америкатә закәан уажәтәи аверсиа ахҩылаа хаҭаҵәҟьа азакәан ҿыц ҳадаҳкылоит», — иҳәеит  Мдинараӡе.

Мдинараӡе иажәақәа рыла, аамҭакала, аиҳабыра, ауаажәларратә еиҿкаарақәа ринициативақәа аҧара рзоушьҭразы афонд еиҿыркаауеит, уи азыҳәан «Агрантқәа ирызку» азакәан аҧсахрақәа аларгалоит.