Апартиа «Ақырҭуа гәахәтәы» аҟынтә Қарҭ ахада иҭыҧаз акандидат Кахи Калаӡе,  алхраҧхьатәи акампаниа аҳәаақәа ирҭагӡаны,  иахьа Ваке араион ауааҧсыра дырҧыланы,  ргәаанагара дазыӡырҩын,  ипланқәа дрылацәажәеит. Ари аинформациа аланарҵәеит  «Ақырҭуа гәахәтәы» апрессмаҵзура.

Дара ринформациа инақәыршәаны,  аҳҭнықалақь ахада еизаз ауаа ҭабуп ҳәа раҳәаны,  анеҩстәи ҧшьышықәса рзы инарыгӡо апроектқәа дрылацәажәеит.

«Қарҭ амҩақәа рҿы есымша аҧсҭазаара еилашуазароуп, аскверқәеи, апаркқәеи, аспорттә ашҭақәеи ауаа рыла иҭәызароуп, абри ауп ҳара хықәкыс иҳамоу. Уажәгьы  наҟ-наҟгьы инаҳагӡо  апроектқәа рыбзоурала ари ахықәкы наҳагӡар ҳалшоит. Ҳара амҩақәа рырҽеиреи рырҿыцреи, ауаажәларратә транспорт аиҿкаареи наҳагӡоит, уи аҳҭнықалақь иқәынхо ауааҧсыра зегьы ирзыманшәалазарц азыҳәан. Иҳаҩсыз ашықәсқәа ирылагӡаны ҳара автопарк ишеибгоу иҳарҿыцит. Амҩақәеи апаркқәеи зеиҧшраз шәгәалашәоит. Ҳәарада, иҵегьы иҟаҵатәу рацәоуп, Қарҭ арҿиара иазку аплан дуқәа ҳамоуп», – иҳәеит  Каха Калаӡе.

Иара иҳәамҭала, аиҳабыра иҟарҵо ашьаҿа цыҧхьаӡа атәылаҿ аҭынчра еиқәзыршәаша аполитика амҩаҧгара иазкуп, уи аҳҭнықалақь аҿиаразы аҵакы ду амоуп.

«Қырҭтәылазы аҭынчра, Қарҭ азы иаҳа мышхәыбзазара  – уи баша алхраҧхьатәи аслоган акәӡам.  Аиҳабыра иҟарҵо ашьаҿа цыҧхьаӡа атәылаҿ аҭынчра еиқәзыршәаша аполитика амҩаҧгара иазкуп, уи аҳҭнықалақь аҿиаразы аҵакы ду амоуп. Ҳара ақырҭуа жәлар ринтересқәа ҳрықәныҟәоит,    ҳҳәынҭқаррареи,  ҳсуверинитети, ҳхьыҧшымреи   ҳахьчоит.  Ҳабацәеи ҳабдуцәеи абри ахақәиҭразы ршьа карҭәеит, уи аиҷаҳара аҭахуп, иаҭаххар, ақәҧаралагьы. Ахақәиҭреи ахьыҧшымреи иреиҳау акгьы иҟам.

«Ақырҭуа гәахәтәы  – Адемократиатәи Қырҭтәыла» имҩаҧнаго аполитика  ҳмилаҭтә интересқәа рыхьчара иазкуп.  Раҧхьа иргыланы,  ҳтәыла ауааҧсыра ринтересқәа ҳахьчоит,  аҳәаанырцәынтә аӡәгьы иҟаҳҵаша ҳаимҳәарцаз. Ҧшәымак ицынхәрас даҽа ҧшәымак имаҵ аура ҟалом. Уи акәӡам ҳабацәа иззықәҧоз. Ҳара аҩызцәеи адгылаҩцәеи ҳҭахуп,  аха,  дарбанзаалак аӡәы ҳтәыла иаҧырхагахаша ак аҟаҵара ҳадицалозар,  уи аҩызарам», – иҳәеит  Каха Калаӡе.

Аиҧылара рхы аладырхәит қарҭтәи алхратә штаб анапхгаҩы Леван Маҷавариании Ваке араион аҟынтә амажоритартә депутатразы акандидатцәеи.