Қырҭтәыла аҧыза-министр Иракли Кобахиӡеи,  Азиатәи Аҿиара Абанк ахада Масато Кандеи,    ADB еснагьтәи ахаҭарнакра  адиректор Лесли Беарман Лаҳмии, афинансқәа рминистр Лаша Хуцишвилии Азиатәи Аҿиара Абанк еснагьтәи ахаҭарнакра аофис ҿыц аадыртит.  

Аиҳабыра рнапхгаҩы иаҵшьны иазгәеиҭеит Қырҭтәыла аиҳабыреи Азиатәи Аҿиара Абанки акыршықәса ирылагӡаны қәаҿиарала аус шеицыруа. Иара убас, аҧыза-министр, ADB анапхгара атәылеи аиҳабыреи рыдгыларазы ҭабуп ҳәа реиҳәеит.  

„Қырҭтәылеи Азиатәи Аҿиара Абанки аусеицура ҷыда рыбжьоуп, ҳусеицура алҵшәа бзиақәа ахылҵуеит. Акыраамҭа иалагӡаны Азиатәи Аҿиара Абанк Қырҭтәылазы зегьы реиҳа зыгәрагоу, зҵакы дуу, аҿиарахь зхы рхоу жәларбжьаратәи партниоруп, ари абанк Қырҭтәыла имҩаҧнаго аусура ҳмилаҭтә приоритетқәа ирышьашәалоуп. Ари абанк еиуеиҧшым аусхкқәа рҿиара иацхраауеит, ҳара уи иҳаракны ахә ҳшьоит.  Уажәазы абанк аинвестициатә портфель 5 миллиард адоллар еиҳауп, ари аҧара зҵакы дуу апроектқәа рынагӡара иазкуп. Азиатәи Аҿиара Абанк ахаҭарнакцәеи Қырҭтәыла ахаҭарнакра анапхгаҩы, ҳаҭыр зқәу Лесли Беарман Лаҳми ҭабуп ҳәа расҳәоит, ҳаҭыр зқәу Лесли Қырҭтәыла адгылара ҷыда азаалырҧшуеит“, – иҳәеит Иракли Кобахиӡе.  

Қырҭтәылеи Азиатәи Аҿиара Абанки рыбжьара қәҿиарала имҩаҧысуа аусеицура далацәажәеит  ADB ахада Масато Канда.  

„Ҳпартниорра ҕәҕәоуп. Азиатәи Аҿиара Абанк акомитет аҵыхәтәантәи аилатәараҿы ишыҳаӡбаз ала, Қырҭтәыла аҳәынҭқарратәи хазхаҭалатәи асекторқәа рҿиара иазоуҳашьҭуеит 1 миллиард еиҳаны адоллар, ари аинвестициа атәыла аекономикатә аҿиара иацхраауеит. Зымҽхак дуу апроектқәа рыдгылареи, амуниципалтә сервисқәа рырҕәҕәареи, аинституциатә реформақәа рымҩаҧгара ацхраареи абзоурала апрогресс ду ҳамоуп. Қырҭтәыла аекономикатә азҳара ҳацхраарц ҳаӡбаанӡа, кыршықәса раҧхьа, атәыла ауааҧсыра рыҧсҭазаашьа аиҕьтәра ҳаӡбеит. Ҳпартниорра ашьаҭа ҕәҕәа амоуп, иаҳзеиҧшу апринципқәа ҳамоуп, иаҳа еиҕьу аҧеиҧш аиқәыршәара иазку ҳхықәкқәа еиҧшуп“, – иҳәеит Масато Канда.  

Азиатәи Аҿиара Абанк анапхгара аофис ҿыц аартра рыдиныҳәалеит афинансқәа рминистр Лаша Хуцишвили. Иара ишиҳәаз ала, ADB ацхыраарала Қырҭтәыла иакымкәа атрансформациатә проектқәа мҩаҧган.  

„Азиатәи Аҿиара Абанк ахаҭарнакра ҭбаахоит Қырҭтәыла аекономикатә азҳара инақәыршәаны. Абанк аинвестициатә портфельгьы азҳара иаҿуп. Иааиуа ашықәс азы ҳусеицура  20 шықәсатәи аиубилеи азгәаҳҭоит, абри аамҭа иалагӡаны Азиатәи Аҿиара Абанк Қырҭтәылазы ахадаратә ҵакы змоу жәларбжьаратәи афинанстә институтс  иҟалеит. Азиатәи Аҿиара Абанк ацхырааралоуп Қырҭтәыла атрансформациатә проектқәа шынагӡо. Дара ҳтәыла 5 миллиард адоллар еиҳаны аинвестициа аларҵахьеит, ари аҧара аҳәынҭқарратәи хазхаҭалатәи асекторқәа рҿиара иазкуп. Абри аҩыза аусеицуразы ҭабуп ҳәа шәаҳҳәоит. Азиатәи Аҿиара Абанк ҳадҳәалоуп  Қырҭтәыла аиҳабыра ринициативақәа зегьы ахьаарҧшу  2024-2028 шықәсқәа рзтәи апартниорра астратегиа алагьы. Аинтенсивтә, амбициатә усеицура ҳабжьоуп, уажәшьҭа Азиатәи Аҿиара Абанк ахаҭарнакцәа абрааҵәҟьа иҳамазаауеит, уи даараӡа ҳаигәырҕьоит. Аиашаз, ҳара еицынаҳагӡо апроектқәа ҳуааҧсыра рыҧсҭазаашьа еиҕьартәуеит“, – иҳәеит Лаша Хуцишвили.  

Азиатәи Аҿиара Абанк еснагьтәи ахаҭарнакра аофис ҿыц аартра ацеремониаҿы иҟан Қырҭтәыла анагӡаратәи азакәанҧҵаратәи мчра алахәылацәеи, жәларбжьаратәи афинанстә институтқәеи абизнесгәыҧқәеи рхаҭарнакцәеи.