«Адебатқәеи аиашара алацәажәареи азин адемократиа ашьаҭақәа иреиуп.  Адебатқәа ауаа алшара рырҭоит згәаанагара еиҧшым ауаа рпозициа азыӡырҩреи анализ азуреи азы», — иҩит Қырҭтәыла аҧыза-министр  Иракли Кобахиӡе асоциалтә аҳаҿы.

Иара иажәақәа рыла, абри ашьаҭоуп адемократиатә ҳәынҭқарра изықәгылоу.

«Ашәышықәсақәа рацәа ирылагӡаны, адебатқәа еиуеиҧшым аформақәа иҟан. Адебатқәа еснагь хықәкык акәын ирымаз  — ауааҧсыра реиҳара дара рхәаҧшырақәеи ргәаанагареи иаҳа ирзааигәоу  апозициа алырхыр акәын.

Адебатқәа ркультура европатәи ацивилизациа аҟазшьа ҷыдақәа иреиуп, европатәи аконтинентаҿ уи адемократиатә ҳәынҭқарра зықәгылоу ашьаҭақәа иреиуп. Адебатқәа мҩаҧысуан еиуеиҧшым аусхкқәа рҿы, аполитика инаркны аспорт аҟынӡа. Уи абзоурала, ауааҧсыра апроблемақәеи аихьӡарақәеи ирызкны инарҭбаау аинформациа роуан, уи алхра иаша аҟаҵараҿы ирыцхраауан.

Рыцҳарас иҟалаз,  2008 шықәса инаркны, Европа аҩныҵҟа, иформалым аолигархиатә напхгара амшала,  аҭагылазаашьа аицәахара иаҿуп. Евроеидгылеи тәылақәаки рхьыҧшымра аҧсыҽра ианалага инаркны, иформалым анапхгаҩцәа дара рхала хықәкыла апроблемақәа иаҧҵаны, ауаа  урҭ рыӡбаразы амҩақәа рыдгалара иалагеит. Ари апроцессаҿ ауаа алхра аҟаҵара азин рымхын, абри зегьы амшала, европатәи аполитика адемократиатә ашьаҭа хада – адебатқәа рымҩаҧгара алшара ацәыӡит.

Иформалым анапхгаҩцәа, европатәи атәылақәа рнырра амзызла, абџьар акәымкәа, иаҳа иҟәымшәышәу аметодқәа рхы иадырхәоит  — аидеологиатәи аинформациатәи хархәагақәа рыла ауаа ирықәыҕәҕәоит.  Ииашоу адебатқәеи, аргама акритика аҟаҵареи, аҭагылазаашьа анализ азуреи ишиашо ари апроцесс иаҿагылоит.  2020 шықәса инаркны иреиҕьу европатәи АИХқәа рҿы апопулиарра ду змаз адебатқәа иаркын, ауаажәларратә ҧсҭазаараҿы еиуеиҧшым агәаанагарақәа разыӡырҩра алшара ибжьаӡит.

Ҳара ари аҭагылазаашьа ҳаҧсахроуп.  Ҳара ауаа адебатқәа рзы азин рырхынҳәра иаҳуалуп,  иформалым амчқәеи  «ақырҭуа агентуреи» русхәаҧштә ҳадцалара азин раҳамҭароуп . Наҟ-наҟ ақырҭуа жәлар, анализ иаша ашьаҭала иарбанзаалак алхра аҟаҵара рылшарц азыҳәан, дара аполитикатә гәыҧқәа зегьы ргәаанагара еилыркаароуп. Ҳара ауаажәларратә ҧсҭазаарашҟа иаарту адискуссиа ҳархынҳәроуп, уи адемократиа аҟазааразы зда ҧсыхәа иҟам ҭагылазаашьоуп», — иҩит  Иракли Кобахиӡе.