Ҳара анализ мҩаҧаагеит, ҳгәы ишаанаго ала, аҷыда занааҭқәак рыда, 3+1 асистемашҟа ҳаиасроуп, хышықәса абакалавриати шықәсык амагистратуреи ирызкызароуп, – иҳәеит Қырҭтәыла аҧыза-министр Иракли Кобахиӡе аҵара ареформа аӡыргараан.

Иара иажәақәа рыла, абакалавриатгьы амагистратурагьы еилыкка иҳәаақәҵоу аҳасабтәқәа рымазароуп, иахьазы уи еиқәыршәам.

„Азанааҭқәа реиҳара рыҭҵааразы хышықәса иазхоит. Ҳәарада, амедицинеи уи еиҧшу аҷыда занааҭқәеи урҭ ирыҵанакуам. Егьирахь, апрактикала, хышықәса рыла абакалавриатә аҩаӡараҟны, иара убас, шықәсык амагистратура аҩаӡараҟны  аҵара аиура ҟалоит. Иара убас, хара имгакәа, егьырҭ ахырхарҭақәа рылагьы  апланқәа рӡыргара ҳгәы иҭоуп. Ҳгәы ишаанаго ала, ашколқәа рҿгьы 11 шықәсатәи аҵаратә программашҟа ҳаиасроуп, Аҵара аминистрра ари ахырхарҭалагьы активла аус ауеит“, – иҳәеит аҧыза-министр.

Иара иажәақәа рыла, еиуеиҧшым афакультетқәа рҿгьы еиуеиҧшым азанааҭқәа рзгьы аҵара аамҭа иарбанзаалак иҵаулоу анализ ашьаҭала иҳәаақәҵам. Аҧыза-министр иажәақәа рыла, ианаамҭаз системак шьақәгылеит,  убри ашьҭахь  аӡәгьы аҵара аамҭа аиҭахәаҧшра иҽазиимкыцт.

„Ахаҭабзиара ахылаҧшра асистема аформалтә ҟазшьа амоуп,  араагьы акрызҵазкәа аиҭакрақәа мҩаҧгатәуп“, – иҳәеит Иракли Кобахиӡе.