Қырҭтәыла аҧыза-министр Иракли Кобахиӡеи апарламент ахантәаҩы Шьалуа Папуашвилии еицыҟарҵаз ажәалагала ашьаҭала, атәыла ахада Михаил Ҟавелашвили, акультура аҿиара аус аҿы алагала ҷыда азыҳәан, акультура аусхкы ахаҭарнакцәа Ахьӡ-аԥша аордени Апрезиденттә орден ҷыда – Аҳаҭыртә ордени ранеишьеит.

Аиҳабыра рнапахагаҩы акультура аусхкы ахаҭарнакцәа аҳынҭқарратә анашьамҭақәа раиура рыдныҳәаланы, акультура аусхкы аҿиараҿы иҟарҵо алагала ҷыда азыҳәан ҭабуп ҳәа реиҳәеит.

„Атәыла аҕәҕәара аполитикатә ҭышәынтәалара ма аекономикатә аҿиара мацарала акәӡам ишҳәаақәҵахо, раҧхьа иргыланы, атәыла аҿиара акультуратә ашьаҭа аҕәҕәара иахьыҧшуп. Аҟазара, аҵарадырра, атрадициақәа, аҭоурых уҳәа, абри зегьы ҧасатәи аҧсҭазаара иаҳзааннажьыз аҭынха мацара акәӡам,  − уи ақырҭуа аҷыдаҟазшьареи уажәтәи ҳаҧсҭазаареи рышьаҭа хадоуп. Ибеиу аҿиара ду змоу акультуроуп  аҷыдаҟазшьара ахьчареи адунеиаҿ иаҧсоу аҭыҧ аанкылареи азы аҳәынҭқарра амч азҭо. Шәара абри зҵакы дуу ашьаҭа шәырҕәҕәоит, ҳтәыла акультуратә ҭынхара шәырбеиуеит. Иахьа ишәоуз аҳәынҭқарратә анашьамҭақәа рыла  шәылшамҭақәа пату шрықәаҳҵо ааҳарҧшыр ҳҭахын, аха, уи  асимволтә ааҧшра мацароуп. Шәара шәыбзоурала, ақырҭуа кинои, ахортә ҟазареи, ҳмилаҭтә хореографиеи аҿиара иаҿуп; шәара аҭоурыхтә гәынкылара шәыхьчоит, алитература аҧсы ҭашәҵоит, игыло аҿар рааӡара шәеиҷаҳауеит; шәызынтәгьы шәеидызкыло акоуп,  шәус гәыкала азныҟәареи  аҧсадгьыл азгәыкреи, уи азыҳәан ҭабуп ҳәа шәасҳәоит. Шәара шәыбзоурала ҳара ҳазынтәгьы иахьагьы ақырҭуа культура ҳазгәдууп. Ҳҭынха ахьчареи игыло абиҧарақәа рзааныжьреи аус аҿы иаашәырҧшуа ахмеигӡара ҷыдала пату ақәҵатәуп. Шәпрофессионализм дуи шәбаҩхатәратә принципқәеи рыла ҳҿар рзы шәҿырҧшыгоуп“, – иҳәеит аҧыза-министр акультура аусхкы ахаҭарнакцәа рахь ихы рханы.

Ахьӡ-аҧша аорденқәа ранашьан акинорежиссиор Мераб Кокоҷашвилии Захариа Палиашвили ихьӡ зху Аопереи абалети аҳәынҭқарратә театр асахьаркыратә напхгаҩи адиректори Бадри Маисураӡеи. Акультура аусхкы аҿиара аус аҿы алагала ҷыда азы Ахьӡ-аҧша аорденқәа ранашьан еиуеиҧшым азанааҭқәа  ирхаҭарнакцәоу  30ҩык.

Акультура аусхкы ахаҭарнакцәа аҳәынҭқарратә анашьамҭақәа раиура рыдырныҳәалеит атәыла ахада Михаил Ҟавелашвилии, апарламент ахантәаҩы Шьалуа Папуашвилии, акультура аминистр Ҭинаҭин Рухаӡеи, Аҷаратәи автономтә республика аиҳабыра рхантәаҩы Сулхан Ҭамазашвилии. Апрезиденттә аханаҿ имҩаҧгаз анашьамҭаҭара ацеремониаҿы иҟан апарламент алахәылацәеи акультура аусхкы ахаҭарнакцәеи.