2012 шықәсанӡа атәыла иахьынӡанаӡааӡо х-ҩызаҵәык апараспортсменцәа иҟан   аспорт ҩ-хкык рҿы, иахьа аспорт 14 хкқәа рҿы 330-ҩык иреиҳаны апараспортсменцәеи жәаҩыла адунеии Европеи рчемпионцәеи ҳамоуп, аиҳабыра наҟ-наҟгьы ирылшо ала апараспорт аҿиара иацхраауеит, – иҳәеит Қырҭтәыла аҧыза-министр Иракли Кобахиӡе Бачо Одишариа идокументалтә фильм – „Ҳәаа змам алшарақәа“ аӡыргараҿы данықәгылоз.

Аиҳабыра рнапхгаҩы ишиҳәаз ала, ари афильм, аконкреттә ҿырҧштәқәа рыла, ибзиаӡаны иаанарҧшауеит ахәыцшьеи апринципқәеи рганахьала аҵыхәтәантәи ашықәсқәа рзы атәылаҿ иҟалаз  аиҭакрақәа, апараспорт ҧаса ишазныҟәоз, иара убас, иахьа иамоу хшыҩзышьҭреи ибзианы иубарҭоуп  астатистика алагьы.

„Аҭоурых зегьы иалагӡаны, ҳтәыла, жәларбжьаратәи амедаль заҵәык аман. Убри ашьҭахь, апараспорт ҷыдала ҳазныҟәоит, уи астатистика алагьы иубарҭоуп.  Иахьа аспорт 14 хкқәа рҿы 330-ҩык иреиҳаны апараспортсменцәеи жәаҩыла адунеии Европеи рчемпионцәеи ҳамоуп, уигьы ҳтәыла  ақәҿиарақәа аазырҧшуа афакторқәа иреиуп. Ҵыҧх мацара 100 раҟара жәларбжьаратәи амедальқәа ҳауит. Парижтәи апаралимпиатә хәмаррақәа рҿы ҳкоманда ақәгылара аҭоурыхтә ҵакы аман, уаҟа, аҭоурыхаҿ раҧхьаӡа акәны, зегьы иреиҕьыз алҵшәақәа ҳауит, апаралимпиатә 9 медальк ҳгеит. Ҳпаралимпиатә гәыҧ алицензиа ахьрымаз аспортхкқәа зегьы рҿы амедальқәа ҳгеит“, – иҳәеит Иракли Кобахиӡе.

Аҧыза-министр ишиҳәаз ала,  абарҭ ақәҿиарақәа апараспортсменцәа ргәырҵҟәыли, рџьабааи, рымхеигӡареи ирыбзоуроуп, иара ишазгәеиҭаз ала, Қырҭтәыла аиҳабыра наҟ-наҟгьы, ирылшо ала, апараспортсменцәеи апараспорт аҿиареи иацхраауеит.

Аиҳабыра рнапхгаҩы ишазгәеиҭаз ала, Қырҭтәыла аиҳабыра ирыдыркылаз аӡбарақәеи азакәанҧҵаратә реформақәеи рышьаҭала, апаралимпиатә ҵысра олимпиатә иаҟарахеит, апаратлетцәеи, разыҟаҵаҩцәеи, рҳақьымцәеи рстипендиақәеи рпремиақәеи – аолимпицәа рулафахәы иаҟароуп.

Иракли Кобахиӡе ақырҭуа параспортсменцәа 2028 шықәсазы Лос-Анжелес имҩаҧысуа ахәмаррақәа рҿы ақәҿиарақәа рзеиҕьашьаны, афильм авторцәа  – арежиссиор Бачо Одишариеи, афильм апродиуссер Гьаргь Грӡелишвилии, инеизакны аҭыхратә гәыҧи ҭабуп ҳәа реиҳәеит.

Аҧыза-министр ҷыдала иазгәеиҭеит афонд  „Қарҭу“-и Биӡина Иванишвилии адокументалатә фильм аҭыхреи апараспорт аҿиареи рҿы иҟарҵаз алагала ду.

„Афонд  „Қарҭу“-и хаҭала ҳаҭыр зқәу Биӡина Иванишвилии абри афильм аҭыхра ацхраара мацараз акәӡам ҭабуп ҳәа зраҳҳәо. Биӡина Иванишвили инапхгаралоуп Қырҭтәыла апараспорт аҿиареи, насгьы, инеизакны, зылшарақәа маҷу ауаа рзинқәа реиҕьтәреи  аиҷаҳара ишалагаз, ари афильмгьы ари адгылара аанарҧшуеит. Ҳаҭыр зқәу Биӡина Иванишвилии афонд  „Қарҭу“-и даҽазнык ҭабуп ҳәа раҳҳәоит. Ари афильм аҿы иаҵшьны иазгәаҭоуп апараспортсменцәа ҷыдала ишеидгыло. Араҟа зҵакы дуу ароль наигӡоит Апаралимпиатә комитет ахада. Шәара, апараспортсменцәа, аӡәи-аӡәи шәеидгылоуп, шәызынтәгьы, шәҽеидкыланы, ҳҳәынҭқарра шәадгылоуп, уи аҵакы ду амоуп. Ҭабуп ҳәа шәасҳәоит ҳбираҟ иҳаракӡаны ашьҭыхреи  ҳхьыӡрашәа арҳәареи азы”,- иҳәеит Иракли Кобахиӡе.

Афильм аӡыргараҿы иқәгылеит Қырҭтәыла ахада Михаил Ҟавелашвилии, апарламент ахантәаҩы Шьалуа Папуашвилии, аспорт азы аминистр Шьалуа Гоголаӡеи. Афильм аҵаки апаралимпиатә спорт аҿиареи иалацәажәеит Апаралимпиатә комитет ахада Рати Ионаҭамишвилии адокументалтә фильм арежиссиор Бачо Одишариеи. Афильм аӡыргараҿы иҟан Қырҭтәыла аиҳабыреи апарламенти рылахәылацәа.