2025 шықәса ажьырныҳәа 29  рзы имҩаҧгаз аилатәараҿы Қырҭтәыла Амилаҭтә банк амонетатә политиказы акомитет алахәылацәа амонетатә политика   азыҧҵәа 8,0% аҩаӡараҟны имҧсахкәа иаанрыжьит.

Ари атәы аарыцҳаит Амилаҭтә банк аҟынтә.

Абанк аҳәамҭа ишану ала,  2023 шықәса инаркны Қырҭтәыла аинфлиациа аҩазара хықәкылатәи арбага –   3% аасҭа илаҟәып.

« 2024 шықәсазы ахәқәа шьҭыҵит 1,9%-ла.  Аинфлиациа арбага ахьчара атәыла аҩныҵҟатәи аекономикатә факторқәа ирыдҳәалоуп. Лымкаала,  Амилаҭтә банк имҩаҧнаго аполитика иаша абзоурала,  акыраамҭалатәи аинфлиациатә азҧхьагәаҭарақәа иҭышәынтәалоуп. Иара убас,   2024 шықәсазы аекономикатә активра дуун,  ажьырныҳәа инаркны абҵаранӡа аекономикатә азҳара арбага  9,4% иаҟаран. Адәныҟатәи афакторқәа ҳрылацәажәозар,  абылтәы ахә лаҟәхеит,  уигьы аинфлиациа амаҷхаразы аанкыларатә анырра аман. Аха,  егьи аганахьала,  жәларбжьаратә аџьармыкьақәа рҿы ааглыхратә аӡа ахә шьҭыҵит,  уигьы аҭыҧантәи аџьармыкьазы анырра амоуп.

Абри аҩыза атенденциақәа шыҟоугьы,  аҩныҵҟатәи агеополитикатәи ҭышәнымтәалара аекономикагьы ианыҧшуеит. Жәларбжьаратәи аџьармыкьақәа рҿы уажәтәи аҭагылазаашьа нагӡахар,  2025 шықәсазы аинфлиациа аҩаӡара хықәкылатәи адырга иазааигәахоит.  Аекономикатә азҳара арбага ахатә акыраамҭалатәи аҩаӡара – 5% иазыхынҳәеит.  Ари асценари иарбоуп Амилаҭтә банк азҧхьагәаҭаҿы.

Аекономика уажәтәи аҭагылазаашьа анализи азҧхьагәаҭаратә сценариқәеи рышьаҭала,  акомитет алахәыла,  азыҧҵәа имҧсахуа,   8% аҩаӡараҟны иаанрыжьырц рыӡбеит. Ашәарҭарақәа рмаҷхара иашьашәаланы,  азыҧҵәагьы хәыҷы-хәыҷла,  анеитралтә  7% аҩаӡаранӡа илаҟәхоит. Анеҩстәи аилатәараҿы амакроекономикатәи дыррақәа аинфлиациа азҳара ма амаҷхара аадырҧшыр,  акомитет иашьашәалоу ашьаҿақәа ҟанаҵоит.

Амонетатә политкиазы акомитет анеҩстәи аилатәара мҩаҧгахоит  2025 шықәса хәажәкыра 12 рзы», – иануп Амилаҭтә банк аҳәамҭаҿы.