Америка аҳәынҭқарратә маӡаныҟәгаҩ Марко Рубио иҳәамҭала,  Урыстәыла адәныҟатәи аусқәа рминистр Сергеи Лавров даниҧылоз, Лавров урыстәыла-украинатә еибашьра иадҳәаланы  „азнеишьа ҿыц“ идигалеит.

Рубио ишиҳәаз ала, Лаврови иареи гәаартыла еиҿцәажәеит, реиҧылара аҵакы ду аман.

Рубио ишазгәеиҭаз ала, Вашингтон лабҿаба ирбароуп Украина аибашьра ахыркәшаразы амҩақәҵага шыҟоу.

„Уи аҭынчра агарантиоуп ҳәа сызшәаҳәом, аха, концепциоуп, иахьа уи Америка ахада изцәырызгоит“, – иҳәеит Марко Рубио.

Иара убас, Рубио ишиҳәаз ала, Америка ахада Дональд Трамп игәы каҳаны дыҟоуп, избанзар, урыстәылатәи аган Украина иадҳәаланы  „иаҳа аихышәашәара“ аанарҧшыр иҭахын.

„Ари азҵаара аҭыҧқәҵаразы аамҭеи ачҳареи аҭахуп, ҳара уи еилаҳкаауеит, аха, ҳгәы каҳаит, избанзар, иаҳа апрогресс иҟазар ҳҭахын“, – иҳәеит Марко Рубио.