«Зыхә лаҟәу агаз ацынхәрас атәыла хәҭак аҭира сгәы иҭам», —  илҳәеит Молдова ахада  Маиа Санду.

Молдова ахада лҳәамҭала, сынтәа аӡынразы атәыла аенергоаиқәыршәара арежим азы иазыҟаҵазароуп.

Санду ишазгәалҭаз ала, Молдова урыстәылатәи  «Газпром» аҟны аиқәшаҳаҭра аднакылеит Москва  «аспекулиациатә» позициа иазҧхьагәаҭаны.

«Фымз рыҩныҵҟа иаҳа зыхә лаҟәу агаз ҳамазаарц азыҳәан атәыла хәҭак аҭира сгәы иҭам.  Ҳтәыла ахы иақәиҭуп, ҳара ари апринцип ҳақәныҟәалароуп. Ааи, уажәы аамҭа цәгьа ҳҭагылоуп, зыхьынџьара апроблемақәа иҟоуп, избанзар абри аамҭа иалагӡаны альтернативақәа  реиқәыршәара ҳалымшеит, избанзар, аенергетикатә проектқәа аҧара рылаҳамҵеит  —  усҟан ари аус ҳазҿлымҳамызт», — илҳәеит  Санду.

Маиа Санду аоппозициатә партиақәа аҿҧныҳәа рылеит зыӡбахәы ҳәоу аиқәшаҳаҭра иадҳәаланы иҟарҵаз акритиказы. Лара ишылҳәаз ала, дара рхаҭагьы, анапхгараҿы ианыҟаз, «Газпром» аҟны кыраамҭалтәи аиқәшаҳаҭра рыдрымкылеит, лара ишылҳәаз ала, усҟан дара  «ртәылауаа ракәымкәа, Москва амаҵ руан».