Америка ахада Дональд Трамп Урыстәылеи Украинеи рыбжьара аҭынчратә аиҿцәажәарақәа апроцессаҿ иӡбам азҵаарақәа дрылацәажәеит.

Ажурналист Дональд Трамп диазҵааит уаҵәы Владимир Путин ҭелла иацәажәара игәы иҭоума ҳәа.

«Уаҵы иҟало аабап  — аиҭакрак ҟалозар ҳазыҧшып. Иҟамлар, Путин иацәажәара аҭахым», — иҳәеит  Трамп.

Америка ахада Украина ареферендум амҩаҧгара азҵаарагьы далацәажәеит.

«Дара апарламентаҿ, мамзаргьы, ареферендум ала рплан шьақәдырҕәҕәар акәхоит. Уи рҭахуп ҳәа сгәы иаанагоит. Аҭҵаарақәа шымҩаҧыргаз здыруеит,  91% ауааҧсыра аибашьра ахыркәшара иақәшаҳаҭуп. Урыстәылагьы уи иаҭахуп. Зегьы аибашьра ахыркәшара иазҿлымҳауп. Ауаа рацәа ишҭахо збар сҭахым», — иҳәеит  Дональд Трамп Владимир Зеленскии иареи еицымҩаҧыргаз апресс-конференциаҿы.

Иара убас,Дональд Трамп иазҵааит Владимир Путин Украина ареферендум амҩаҧгаразы амца аанкылара дақәшаҳаҭума ҳәа.

«Мап, амца аанкылара дақәшаҳаҭым. Ари азҵаарагьы аус адулара ҳаҿуп. Путин игәаанагарала,  уажәы аибашьра инагӡоит, ақәҧара ааныркылар, анеҩс, изеиқәшаҳаҭымкәа аибашьра еиҭалагар, Урыстәыла аҭагылазаашьа цәгьахоит. Сара ари апозициа еилыскаауеит. Путин абри аҩыза аҭагылазаашьаҿы дҟалар иҭахым. Ари агангьы еилкаатәуп. Сара аҭынчра садгылоит, аибашьра хыркәшазар сҭахуп. Ари апроблема ӡбахоит ҳәа сгәы иаанагоит», — иҳәеит  Трамп.