Қырҭтәыла Актәи аканал Ауаажәларратә дырраҭара иаҿагыланы имҩаҧысуа апроцессқәа ирылахәы Актәи аканал аусзуҩцәа ирыдҳәаланы имҩаҧгаз алеишәатә усмҩаҧгара алҵшәақәа рышьаҭала ирыдыркылаз ақәҵара иазкны аҳәамҭа аланарҵәоит.

Зыӡбахәы ҳәоу аусзуҩцәа,  мызқәак ирылагӡаны, дареи Ауаажәларратә дырраҭареи ирыбжьарҵаз аиқәшаҳаҭрақәеи адырраҭара аҩныҵҟатәи аҧҟарақәеи  еиларгон.

Ауаажәларратә дырраҭара Ажәабжь ҿыцқәа рмаҵзуреи аналитикатә программақәеи рымҩаҧгаҩцәеи ржурналистцәеи аҭакҧхықәра ҷыда рыдуп,  дара астандартқәа зегьы ирықәныҟәалароуп.

Хыхь зыӡбахәы ҳәоу аусзуҩцәа, дара  иҟарҵо аҳәамҭақәа рыла,  аусураҭаҩ иҟны аустә аконструктивтә еизыҟазаашьақәа рзы алшарак аанырмыжьит,  убри аҟынтә,  анормалтә усеицура зыҟалом.

Иарбанзаалак аиҿкаараҿы аусуреи аусеицуреи мҩаҧысуеит аҩ-ганк рҭаххарала,  ҳазлацәажәо аус аҿы уи еиҧш аҭаххара иҟам,  убри аҟынтә,  Қырҭтәыла Актәи аканал аӡбара аднакылеит апрограмма «Реалури сиврце» амҩаҧгаҩ Нино Зауташвилии аинформациатә дырраҭара «Моамбе» амҩаҧгаҩ Уасилом Иванов-Чиковании рҟны аустә еизыҟазаашьақәа раанкыларазы.  Егьырҭ аусзуҩцәа рзы  алеишәатә лахьыҭара  еиуеиҧшым аформақәа ахархәара роуеит.

Иаҵшьы иазгәаҳҭар ҳҭахуп Ауаажәларратә дырраҭара ихьыҧшым амедиатә аиҿкаара шакәу,  уи аус ауеит амч змоу азакәанҧҵареи жәларбжьаратәи астандартқәа ирышьашәаланы иара ахала ишьақәнаргылаз анормативтә актқәеи рышьаҭала. Ауаажәларратә дырраҭара даҽазнык аргама аанацҳауеит уи аредакциатә хьыҧшымра ажәылареи,  адырраҭара ахьӡ лазырҟәо адезинформациа аларҵәареи ақәҿыҭрада ишаанымхо.