Аҳәынҭқарратә шәарҭадара амаҵзура ахаҭарнакцәа, жьҭаара 4 рзы иҟалаз ахҭысқәа ирыдҳәаланы,  Қырҭтәыла атәылахьчара ҧасатәи аминистр Бачо Ахалаиа дааныркылеит.

Уи еилкаахеит Аҳәынҭқарратә шәарҭадара амаҵзураҿы имҩаҧгаз абрифинг аҿы.

Аҳәынҭқарратә шәарҭадара амаҵзура адыррақәа рыла,  аусеилыргараан еилкаахеит Бачо Ахалаиа жьҭаара 4 рзы иҟалаз ахҭысқәа аинтернетла анапхгара шриҭоз.

«Аусеилыргараан ишеилкаахаз ала,  Бача Ахалаиа,  жьҭаара 4 рзы иҟалаз ахҭысқәа аинтернетла анапхгара риҭон.  Иара иоуп Қырҭтәыла абарҭ ахҭысқәа еиҿызкаауаз.

Ҳара инарҭбааны аилыркаарақәа ҟаҳҵар ҳалшоит. Жьҭаара 4 рзы иҟалаз ацәгьауратә хҭысқәа рзы ахара зду  ауааҧсыра аинтернетла аимадара рыман,  Бачо Ахалаиа иҧҳәыс Анна Надареишвили лыхьӡала ашәҟәы иҭагалоу  IP-аҭыӡҭыҧқәа рылагьы, 2025 шықәса  цәыббра 28 асааҭ 21:00 инаркны дара иааныркылаанӡа. Лымкаала, зынӡа  343 интернет-сессииқәа мҩаҧган, урҭ рҟынтә:  Мурҭаз Зоделава иҟны  — 157-нтә,  Паата  Бурҷулаӡе иҟны  — 110-нтә,  Паата Манџьҕалаӡе иҟны — 29-нтә,  Лаша Бериӡе иҟны  — 26-нтә,  Иракли Надираӡе иҟны  — 21-нтә.

Иара убас, идыру ахҭысқәа реиҿкаара инамаданы, жьҭаара 4 рзы, Марҭаз Зоделава изныкымкәа, Бачо Ахалаиа иҧҳәыс лыхьӡала иҟоу  IP-аҭыӡҭыҧ аҟны аинтернет-аимадара иман. Насгьы, реиҿцәажәара руакы анеҩс 4 минуҭк анҵы, адемонстрантцәа Ахақәиҭра ашҭа ахырхарҭала идәықәлеит. Анеҩстәи аинтернет-сессииақәа мҩаҧган асааҭ 17:51-и асааҭ 18:06-и рзы. Ҷыдала иазгәаҭатәуп –  жьҭаара 4 рзы Мурҭаз Зоделавеи Анна Надареишвили лыхьӡала иҟоу  IP-аҭыӡҭыҧи рыбжьара аимадара мҩаҧган Зоделавеи Паата Бурҷулаӡеи амчыларазы ааҧхьара ҟарҵаанӡа  9 минуҭк шагыз: асааҭ 18:44:11 рзы.

Убри аҽныҵәҟьа, Паата Бурҷулаӡе, Бачо Ахалаиа иҧҳәыс лыхьӡала иҟоу  IP-аҭыӡҭыҧ аҟны ҩынтә аинтернет-аимадара иман.  Жьҭаара 4 рзы  Лаша Бериӡе бжьынтә Бачо Ахалаиа аинтернетла диацәажәеит.  Убри аамҭазы Лаша Бериӡе апрезиденттә ахан аҧхьа дгылан, иара Бачо Ахалаиа иҟынтә адҵақәа иоуан.

Ашаҳаҭгақәа рышьаҭала ишьақәырҕәҕәоуп жьҭаара 4 рзы Қырҭтәыла иҟалаз ацәгьауратә хҭысқәа анапхгара шырзиуаз Бачо Ахалаиа. Убри аҟынтә, ҳара Бачо Ахалаиа даанаҳкылеит.

Иара ицны иаанкылаз иҧҳәас  Анна Надареишвили доужьҭуп. Наҟ-наҟ, аусеилыргара, лхаҵа иҟаиҵаз ацәгьаураҿы лалахәызаара азҵаара ахәаҧшра нанагӡоит», — ирҳәеит Аҳәынҭқарратә шәарҭадара амаҵзураҿы имҩаҧгаз абрифинг аҿы.