Қырҭтәыла Аҳәынҭқарратә шәарҭадара амаҵзура  адыррақәа рыла, сынтәа, хәажәкыра 22, асааҭ   14:30 рзы, Қырҭтәыла Аҩныҵҟатәи аусқәа рминистрра Аполициа адепартаментахь адырра ҟаҵан  атеррористтә акт иазкны. Зыхьӡ еилкаамыз ахаҿы аполициахь аҭел дасын, ишиҳәаз ала, иара Самеба аныхабаа аҵакырадгьылаҿ дыҟоуп, амца бџьар имоуп, насгьы, аныхабаа аҵакыраҿ  аҧжәага шьҭеиҵеит.

«Иара ишиҳәаз ала,  20 минут рыла аевакуациа мҩаҧаҳамгар, аҧжәара ҟалоит. Ихаҭара ааимырҧшырц азыҳәан, апрограмматә система ҷыдала ибжьы иҧсахит, атәым ҳәынҭқарра авиртуалтә аҭел аномер ихы иаирхәит, иара убас,  IP-аҭыӡҭыҧ иҵәахит.

Азинхьчаҩцәа, аоперативтә усмҩаҧгатәқәа мҩаҧганы, убри аҽныҵәҟьа зықәра наӡам ихьӡ еилыркааит. Иара идырбалеит иакымкәа амобилтә ҭелақәеи, аноутбукқәеи,  аусеилыргаразы зҵакы дуу егьырҭ амаҭәарқәеи. Зықәра наӡам ахаҿы ацәгьаура шыҟаиҵаз иазхеиҵеит.

Иара ахара идуп Ашьауҕатә закәанеидкыла  331 ахәҭаҷ ала  — атерроризм иазку адырра ҧаршеи аҟаҵаразы. Ари ацәгьауразы иазҧхьагәаҭоуп 3 шықәса инаркны  6 шықәсанӡа аҭакра», — иануп Аҳәынҭқарратә шәарҭадара амаҵзура аинформациаҿы.