Վրաստանի փոխվարչապետ, արտաքին գործերի նախարար Միխեիլ Ջանելիձեն Մյունխենի անվտանգության կոնֆերանսի շրջանակներում հանդիպել է Գերմանիայի դաշնային հանրապետության, արտաքին և անվտանգության հարցերով կանցլերի խորհրդատու՝ Յան Հեկերի հետ:

Վրաստանի արտաքին քաղաքական գերատեսչության փոխանցմամբ, հանդիպմանը խոսքը վերաբերել է Վրաստան-Գերմանիա երկկողմ համագործակցությանը, Վրաստանի եվրոպական և եվրաատլանտյան ինտեգրման գործընթացին և տարածաշրջանում անվտանգության միջավայրին:

Կողմերը դրական են գնահատել եվրոպական և եվրաատլանտյան ինտեգրման ճանապարհին Վրաստանի առաջընթացը և Գերմանիայի ակտիվ աջակցությունը այդ ուղղությամբ:

Առանձնապես նշվել է Վրաստանի քաղաքացիների համար՝ Եվրամիության/Շենգենի գոտում առանց այցեգրերի երթևեկության թույլտվությունը և անայցագրային երթևեկության կարևորությունը Վրաստանի Եվրամիությանը ինտեգրվելու գործընթացի համար:

Խոսքը վերաբերել է նաև այցեգրային ազատականացման ընթացքին և վերջին ժամանակներում այս գործընթացում ստեղծված բարդություններին, հիմնականում Վրաստանի քաղաքացիների կողմից անայցագրային ռեժիմի խախտմանը և Եվրամիության անդամ երկրներում ապաստան խնդրելուն:

Գերմանական կողմը իր պատրաստակամությունն է հայտնել աշխատել վրացական կողմի հետ այս հիմնախնդրի կարգավորման համար:

Վրաստանում մարդու իրավունքների և ժողովրդավարական զարգացման տեսանկյունից գոյություն ունեցող առաջընթացը նախատեսելով, նշվել է Գերմանիայի կողմից Վրաստանը անվտանգ երկրների ցուցակում ներառելու նշանակությունը:

Կողմերը պայմանավորվել են համագործակցությունը շարունակել նույն տեմպերով, արդյունքում խորացնելով երկկողմ հարաբերությունները: