«Евроеидгыла иалоу атәылақәа реиҳабырақәа Балтиатәи атәылақәа рқьынцыцра иақәымныҟәароуп, Қырҭтәылеи Евроеидгылеи реизыҟазаашьақәа амҩа иашахь идырхынҳәроуп», — иҩит Қырҭтәыла апарламент ахантәаҩы Шьалуа Папуашвили асоциалтә аҳаҿы.

Папуашвили иажәақәа рыла, ҳара изныкымкәа иҳаҳахьеит Балтиатәи атәылақәа Қырҭтәыла ахьыҧшымреи аҵакырадгьылтә акзаареи иадгылоит ҳәа, аха, ишубарҭоу ала, ареалтә дунеиаҿ арҭ атерминқәа дара рзы изакәызаалак ҵакык рымам.

«Ҧасатәи ахада Саломе Зурабишвили ҧаса Асовет Еидгыла иалаз балтиатәи атәылақәа рҿы лвизит лабҿаба иаанарҧшит арҭ атәылақәеи европатәи абиурократиеи Қырҭтәыла цәгьала ишазныҟәо. Араҟа зҵакы дуу 3 аспектк иалкаатәуп: амилаҭтә хьыҧшымра мап ацәкреи, алегитимтә напхгара аҵшәаареи, дара рхала ирхәыцыз еицәтәароу адунеи аҧҵареи. Абарҭ аспектқәа зегьы Асовет Еидгыла адәныҟатәи аполитика ҳгәаладыршәоит.

Ҳара изныкымкәа иҳаҳахьеит Балтиатәи атәылақәа Қырҭтәыла ахьыҧшымреи аҵакырадгьылтә акзаареи иадгылоит ҳәа, аха, ишубарҭоу ала, ареалтә дунеиаҿ арҭ атерминқәа дара рзы изакәызаалак ҵакык рымам. Дара ақырҭуа жәлар реиҳара рхы иақәиҭны атәыла анапхгара ралхразы ирымоу азин ладырҟәозар, нас  Қырҭтәыла ахьыҧшымра ишҧадгыло? Ҵыҧх, ҧхынҷкәын азы зыҿҳәара нҵәаз ҧасатәи ахада Қырҭтәыла азакәантә хаҭарнак заҵәыс лызхаҵара Қырҭтәыла ахьыҧшымра адгылара аума иаанаго? Қырҭтәыла ауааҧсыра рзы зегьы дара ракәӡами Асовет Еидгыла акәу Литва акәу рхатә напхгара алхразы ирымоу азин еилазго?

Насгьы, аиҳабыреи ажәлари реиҟәыҭхара  — ихьыҧшым аҳәынҭқаррақәа рҩныҵҟатәи аусқәа рҽалагаларазы Асовет Еидгыла анапхгара рхы иадырхәоз аметодқәа иреиуп.  Аҵыхәтәантәи аамҭазы Балтиатәи атәылақәа рнапхгаратә хаҿқәа Қырҭтәыла аиҳабыреи ақырҭуа жәлари еиҿадыргылар шырҭаху ҳбоит. Ҧасатәи ахада Зурабишвили арҭ атәылақәа рахь лнеира даҽазнык аанарҧшит арҭ атәылақәа уажәгьы асоветтә методқәа рхы ишадырхәо.

Ахҧатәи –  имцырку авиртуалтә дунеи аҧҵара, дара Қырҭтәыла аадырҧшыр рҭахуп Урыстәыла изхылаҧшуа агәымбылџьбаратә диктатура аҳасабала. Уи мцуп, уи изакәызаалак ак ала адемократиа аиҷаҳара иадҳәалам. Естониеи Латвиеи Лиетувеи, Урыстәыла хшыҩзышьҭра даҽа хырхарҭак ахь ирханы, рхатә шәарҭадара дырҕәҕәар рҭахуп. Убри азоуп Украина аибашьра ианалагаҵәҟьа, дара активла Қырҭтәылантә изаҳәоз ҳара Москва ҳаҿагыларц.  Ҳара Евроеидгылеи НАТОи ҳалам, аӡәгьы ҳихьчом, дара ринтересқәа рыхьчаразы Қырҭтәыла ахатә амилаҭтә интересқәа мап рыцәнакырц иаҳәон. Дара рполитика даҽа аилыркаарак узаҭом.

Насгьы, балтиатәи атәылақәа Украина аҧеиҧш абас иаргәамҵуазар, рбџьармчқәа украинатәи афронахь идәықәырҵон. Уи азы азин аиура рҭахым.

Евроеидгыла иалоу атәылақәа реиҳабырақәа Балтиатәи атәылақәа рқьынцыцра иақәымныҟәароуп, Қырҭтәылеи Евроеидгылеи реизыҟазаашьақәа амҩа иашахь идырхынҳәроуп, уи аҵакы ду амоуп», — иҩит  Шьалуа  Папуашвили.