«Маргвелашвили иҟаиҵаз аҵыхәтәантәи иҳәамҭақәа рҿы Қырҭтәыла абаандаҩцәа иргәаҟны иршьозшәа иҳәеит. Абри зегьы мцуп  — иҵаҵгәыркым ахарадҵароуп», — иҩит асоциалтә аҳаҿы Қырҭтәыла аиустициа аминистр  Рати Брегаӡе.

Иара иажәақәа рыла, Гьаргь Маргвелашвили аҳәынҭқарра амилиҭтә интересқәа ирышьашәаланы ихы мҩаҧигароуп.

«Қырҭтәыла ахадас иҟаз, Қырҭтәыла Атәылахьчаратә мчқәа Иреиҳаӡоу асардалс иҟаз  ауаҩҧсы,  ипрезиденттә аҿҳәара анеҩсгьы аҳәынҭқарра амилаҭтә интересқәа ирышьашәаланы ихы мҩаҧигароуп.

Зхатә тәыла аиҳабыреи аҳәынҭқарратә маҵзуҩцәеи  ирызкны амц зҳәаз, ҧасатәи ахада, арадикалтә оппозициаа рыдгылаҩ иаҳасабала ауаажәлар рҿаҧхьа дықәгыланы, аргәаҟра иазкны амцҳәара даҿуп, апенитенциартә системаҿ аус зуа зқьҩыла ауааҧсыра раҳаҭыр лаирҟәоит», — иҩит  Рати Брегаӡе.