Аинвестициатә џьармыкьеи активқәеи рдиверсификациа амзызла,  Қырҭтәыла Амилаҭтә банк  ахьтәы сертификатқәа рҭрыжьреи ахьырҭәахқәа рыҭиреи иалагоит, уи адунеиаҿ зегьы раасҭа иазхаҵоу аинвестициатә практикоуп.

Ари аинформациа аланарҵәеит Қырҭтәыла Амилаҭтә банк.

Абанк адыррала, иашьашәалоу аӡбара аднакылеит Амилаҭтә банк ахеилак.

Абанк аинформациа ишану ала, аҵыхәтәантәи аамҭазы, аинфлиациеи  агеополитикатә шәарҭақәеи рацлара амзызла, аҳәынҭқаррақәа рацәа рҿы ахьы азы аҭаххара азҳаит.

«Ахьтәы сертификатқәагьы ахьырҭәахқәеи  20 грамми 1 кьылаки аноминал рымазаауеит. Амилаҭтә банк аинтернет-адәқьанаҿ  20 грамм иакапануа ахьырҭәах аахәара ҟалоит.  Асаитаҿ ахәархәаҩцәа, ахьырҭәахәқәа рыхәқәа ирызку аинформациа иаҧхьар рылшоит. Ахәқәа шьақәыргылахоит  Зыхә дуу аметаллқәа рџьармыкьа Лондонтәи ассоциациа  (LBMA) асаитаҿ иарбоу ахәқәа инрықәыршәаны.

1 кьылак иакапануа ахьырҭәах аахәара ҟалоит Қырҭтәыла Амилаҭтә банк акассатә центр аҿы  (ашәахьа – ахәаша  10:00-13:00; 14:00-17:00)», — иануп Амилаҭтә банк аҳәамҭаҿы.

Абанк адыррала, Амилаҭтә банкаҿ ирҭиуеит Британиа Ду Акралтә монетатә шҭа иҭнажьыз зыцқьара ҳараку  (AU 999,9) ахьырҭәахқәа.