«Шықәсык ҵит  Урыстәыла мзызда Украина иажәылеижьҭеи. Ари аибашьра жәларбжьаратәи зин апринципқәа еиланагоит», —  иҳәеит Қырҭтәыла иҟоу Евроеидгыла ацҳаражәҳәаҩ Павел Герчински. Иара иҳәамҭала аланарҵәеит Қырҭтәыла иҟоу Евроеидгыла ахаҭарнакра.

Ацҳаражәҳәаҩ иажәақәа рыла, ЕАР аҧҟаҧҵа инақәыршәаны, Украиназы агрессиа мҩаҧгоуп, ари атәыла ахыхьчара азин амоуп.

«Евроеидгыла, ҧасеиҧш, ахырхарҭақәа зегьы рыла  – агуманитартәи, аекономикатәи, аполитикатәи, адипломатиатәи, арратәи ганахьала ҕәҕәала Украина иадгылоит. Ари агрессиа ихьыҧшым аҳәынҭқарра мацара акәӡам изҿагылоу, уи адемократиатә дунеи зегьы иаҿагылоуп. Уи аҳәынҭқаррақәа зегьы рзы шәарҭароуп, избанзар рхьыҧшымра иадҳәалоуп.

Евроеидгыла излауа ала иҕәҕәаны Урыстәыла ақәыӡбара иазҿлымҳауп. Жәларбжьаратәи уаажәларра зегьы ари азҵаараҿы еидгылоуп, ҳара зеиҧшҟамлац ала зымҽхак дуу ауснагӡатәқәа еицымҩаҧаагоит. Қырҭтәылагьы арҭ апроцессқәа ирылахәып.

ЕАР Ассамблема Хада 6 резолиуциак рыла Урыстәыла иақәыӡбит, арҭ арезолиуциақәа инрықәыршәаны, агрессор-ҳәынҭқарра  хымҧада аҭакҧхықәра адҵатәуп.

Қырҭтәылеи Евроеидгылеи русеицура ҕәҕәа  шьақәгылеит азеиҧш европатәи принципқәа рышьаҭала.  Евроеидгыла Қырҭтәыла ананашьеит европатәи аперспектива, Евроеидгыла алалара амзызла акандидат астатус аиуразы аконкреттә шьаҿақәа ҟаҵатәуп. Ари апроцесс ала иазҧхьагәаҭоуп ареформақәа рымҩаҧгара.

Украина  Европа изықәгылоу апринципқәа ирзықәҧоит, Украина ақәҧара  – ҳара ҳақәҧароуп, Украина аиааира агароуп. Ахьӡ-аҧша амазааит Украина!» — иҳәеит Павел Герчински.