«Гәахәарала иазгәасҭар сҭахуп ҳтәылақәа рыбжьара аполитикатә диалог аҟазаареи ҳусеицура иамоу астратегиатә аҵаки даҽазнык ашьақәырҕәҕәара алшара сшымаз», — илҳәеит Қырҭтәыла адәныҟатәи аусқәа рминистр Мака Боҷоришвили х-тәылак рдәныҟатәи аусқәа рминистрцәа реиҧылара ашьҭахь имҩаҧгаз апресс-конференциаҿы.

Боҷоришвили лҳәамҭала, Қырҭтәылеи, Ҭырқәтәылеи,  Азербаиџьани акыршықәса ирылагӡаны қәҿиарала аусеицура аганахьала иҿырҧшыгоуп.

«Ҳпартниорра ақәҿиара шамоу шьақәдырҕәҕәоит ҳара еицынаҳагӡо, зҵакы дуу аинфраструктуратәи, аенергетикатәи, атранспорттәи  проектқәа, урҭ ҳтәылақәа мацараз акәымкәа, арегион зегьы азы аҵакы ду рымоуп. Акыршықәса ирылагӡаны абри х-ганктәи аформат арегионалтә усеицура аганахьала иреиҕьу амеханизмқәа иреиуп.

Ҳаамҭазтәи жәларбжьаратәи аҭагылазаашьа ҭышәынтәалам, уи иазҧхьагәаҭаны иуҳәозар,  Қырҭтәылеи, Ҭырқәтәылеи, Азербаиџьани х-ганктәи аформат азеиҧш хықәкқәа рынагӡаразы аусеицура алшара ҳнаҭоит. Иахьа ҳара,  адунеи аҿгьы, арегион аҿгьы имҩаҧысуа апроцессқәеи, апроблемақәеи, иара убас, аусеицура арҕәҕәареи арҭбаареи азы иҟоу аперспективақәеи  ҳрылацәажәеит.

Ҳара, ҳусеицура ахырхарҭақәа зегьы ахьарбоу азеиҧш декларациа ҳнапы аҵааҩит. Қырҭтәылеи, Ҭырқәтәылеи, Азербаиџьани аганрацәалатә усеицуреи апартниорра ҕәҕәеи рыбжьоуп», — илҳәеит  Боҷоришвили.