«Сареи сколлегацәеи  PACE аделегациа алахәылацәа ҳарҧылоит. Уи еиуеиҧшым ахырхарҭақәа рыла атәылаҿ имҩаҧысуа апроцессқәа ирыцклаҧшуа амониторингтә комитетуп. Анеҩс,  дара,  аполитикатә акторцәа Европа ахеилак аҿаҧхьа рхы иадырҵаз аҧхықәрақәа рынагӡашьа ахәшьара арҭоит», — иҳәеит  «Ақырҭуа гәахәтәы» алахәыла Леван Махашвили.

Махашвили иҳәамҭала,  PACE аделегациа алахәылацәа  жьҭаара 4 рзы иҟалаз ахҭысқәа еилыкка ахәшьара рырҭароуп,  избанзар,  дара иҟарҵо ажәахә атәыла анапхгара рҭакҧхықәра мацара акәымкәа,  аполитикатә акторцәа зегьы роуранагӡара иазкуп.

«Ҳара ажәахә анаҳбалак,  ахәшьара аҳҭоит. Уаҟа жьҭаара 4 рзы иҟалаз ахҭысқәа ирыдҳәаланы еилыкка рпозициа аадмырҧшыр,  арадикалтә гәыҧқәа рҭакҧхықәра иазгәарымҭар,  иарбанзаалак даҽа ажәахәк ииашахом. Уара аобиективтә анаҧшҩы уакәзар,  аха,  заанаҵы иҳәаақәҵоу апозициала уаауазар,  ҳәарада,  уобиективра иадҳәаланы азҵаарақәа цәырҵуеит.  Ҳара PACE аделегациа  алахәылацәа интересс ирымоу атемақәа зегьы рзы ҳрацәажәоит, нас, хымҧада, ҳара интересс иҳамоу азҵаарақәа рзықәҳаргылоит. Ишыздыруа ала, апарламент ахантәаҩгьы дырҧылоит», — иҳәеит  Махашвили.