CNN – Пентагон Украина ацхрааразы арезерв аҟынтә 4 миллиард адоллар ахархәара азҵаара иахәаҧшуеит
Америка атәылахьчара адепартаментаҿ Украина ацхрааразы арезерв аҟынтә 4 миллиард адоллар ахархәара азҵаара иахәаҧшуеит. Ари аинформациа аланарҵәеит CNN.
Аҭыжьымҭа адыррала, атәылахьчара адепартамент, атәыла ахада ирезервтә фондаҿ Украиназы иҵегьы 4 миллиард адоллар амоуп. Уи абзоурала, Пентагон, Америка ашьҭаҵарҭақәа рҟынтә абџьар адәықәҵара алшоит, аха, адепартамент ари абџьар ацынхәрас абџьар ҿыц аахәара алшара амам. Иара убас, Пентагон изакәызаалак гарантиак амам зыӡбахәы ҳәоу 4 миллиард адоллар инырхыр, Конгресс ари ахарџь аханарҭәаап ҳәа.
CNN адыррала, ари азҵааразы аҵыхәтәантәи аӡбара макьана ирыдрымкылацт.