Бельгиатәи аӡбарҭа аҳәарала, Европарламент изаамҭаным апроцедура иалагеит ҩыџьа европарламентарцәа – аиталиан Андреа Коццолинои абельгиец Марке Тарабеллеи аламкьысра азин рымхразы. Дара рҩыџьагьы «Социал-демократиатә гәыҧ» иалахәып.

«Европатәи апаламент аханатәгьы  ауселыргара ацхрааразы иалшоз зегьы ҟанаҵеит, ахьырхәрадара ҟамларцаз  наҟ-наҟгьы иаҭаху зегьы ҟаҳҵоит. Ахара зду ауааҧсыра лабҿаба ирбоит ари апарламент азакәан ишақәныҟәо», – илҳәеит Европарламент ахада  Роберта Метсола.

Акоррупциатә аҭыӡшәа ҟалеит Европарламент аҿы аҭыҧ дуқәа аанызкыло ахаҿқәа аҵыртыша рыҭара амшала.  Аусеилыргара аҳәаақәа ирҭагӡаны даанкылоуп Европарламент ҧасатәи авице-ахада Ева Каили. Лара закәандарала Ҟатар алоббизм лхарарҵоит, иара убас, даанкылоуп  Европарламент ҧасатәи адепутат  Пиер-Антонио Панцери.

Ауселыргара иадҳәаланы, Европарламент, Ҟатар атәылауаа Евроеидгыла ақәыҧшылараҿы авизадатә режим рыҭара иадҳәалаз абжьыҭира ааннакылеит, иара убас, акоррпуциазы гәҩарас ирымоу Каили аусура дамырхит.