Европа ахеилак апарламенттә асссамблеиа Азербаиџьан аделегациа рыгәраргагатә шәҟәқәа рратификациа мап ацәнакит. Аиҿҟаара аҳәамҭа инақәыршәаны, Азербаиџьан 20 шықәса раԥхьа Европа ахеилак ашҟа алалараан ишьақәгылаз ашьаҭатәи хыдҵақәа нанамгӡеит.

Азербаиџьан иазкыз аӡбара иадгылеит 76-ҩык адепутатцәа, 10-ҩык иаҿагылеит, ԥшьҩык абжьыҭираан рпозициақәа аадмырԥшит.

“Агәынамӡара ӷәӷәа ҳамоуп Азербаиџьан зхы иақәиҭу ииашоу алхрақәа рымҩаԥгареи, азинмчы аиҟәшареи, азакәанԥҵаратә напхгара аԥсыҽреи, аӡбарҭатә мчра ахьыԥшымреи, ауаҩытәыҩа изинқәа пату рықәҵареи ирызкны, ари зегьы иаарԥшуп Венециатәи акомиссиеи Ауаҩытәыҩса изинқәа европатәи аӡбарҭеи ргәаанагарақәа рҿы”, – иануп арезолиуциа аҿы.

“Азербаиџьан аделегациа ассамблеиаҿ аусзура еиҭалагара алшоит арегламент ала иазыԥхьагәаҭоу аҭагылазаашьақәа анынанагӡо ашьҭахь”, – иазгәерҭеит адепутатцәа.

Ажьырныҳәа 24 рзы Европа ахеилак апарламенттә асссамблеиаҿ иҟоу Азербаиџьан аделегациа иҟанҵаз аҳәамҭала, Европа ахеилак апарламенттә асссамблеиаҟны аизыҟазаашьақәа аԥнахуеит.