Թբիլիսիի ինֆեկցիոն հիվանդանոցի տնօրեն, Թենգիզ Ցերցվաձեի հայտարարությամբ, Եվրոպայում և Ամերիկայում ամեն օր գրանցվում է ռեկորդային թվով կորոնավիրուսի նոր դեպքեր և խոսքը գնում է վարակի երրորդ ալիքի տարածման մասին:

Ցերցվաձեի խոսքով, Վրաստանում համավարակաբանական իրավիճակն արդեն կայունացել է և նրանք փորձում են նվազագույնի հասցնել դեպքերը մինչև փետրվար, երբ սպասվում է երրորդ ալիքը:

«Ամբողջ Եվրոպայում և Ամերիկայում խոսում են երրորդ ալիքի մասին: Ամեն օր արձանագրվում է նոր դեպքերի ռեկորդային քանակ: Կան ենթադրություններ, որ երրորդ ալիքը կսկսվի փետրվարին: Մենք, ընդհակառակը, ցանկանում ենք փետրվարին երկրորդ ալիքը հասցնել նվազագույնի: Կայունացումն արդեն հաջողվել է, եղել է 4-5 հազար դեպք, հիմա ՝ հազարից երկու հազար: Այդ պատճառով էլ երկարաձգվեցին սահմանափակումները: Դեպքերը պետք է նվազագույնի հասցվեն, քանի որ երբ կանոնակարգերը կվերացվեն, և մենք ակնկալում ենք, որ դրանց վերացումից հետո կսկսվի երրորդ ալիքը, հնարավորինս ցածր վարակման ցուցանիշ ունենանք, որքան հնարավոր է քիչ դեպքեր, որպեսզի աճը շատ չլինի: 500-ից ավելանալը այլ է, իսկ հինգ հազարից ՝ այլ», – հայտարարել է Թենգիզ Ցերցվաձեն:

Ըստ Թենգիզ Ցերցվաձեի, Վրաստանում կորոնավիրուսի երրորդ ալիքը կանխելու համար իդեալական կլիներ պահպանել սահմանափակումները, բայց երկիրը երկար ժամանակ չի կարողանա մնալ այս ռեժիմում: Ուստի, ըստ Ցերցվաձեի, սահմանափակումների վերացմանը զուգահեռ, պետք է խստացվեն կանոնակարգերը և դրա կիրառման նկատմամբ վերահսկողությունը: