Մենք ունենք շատ հստակ օրակարգ, մենք հավակնոտ նպատակ ունենք մինչև 2030 թվականը դառնալ Եվրամիության անդամ,- Հունգարիայում լրագրողներին ասել է Վրաստանի վարչապետ Իրակլի Կոբախիձեն։

Ինչպես նշել է վարչապետը, բոլոր թեկնածու երկրների համեմատ Վրաստանն ավելի պատրաստ կլինի անդամակցել Եվրամիությանը բոլոր առումներով՝ լինի դա ժողովրդավարություն, մարդու իրավունքներ, տնտեսություն, թե այլ ոլորտներ։

«Այս ընտրություններում, ի թիվս այլ բաների, որոշվեց երկրի եվրոպական ապագայի ճակատագիրը։ Գիտեք, թե ինչ ծրագրեր ուներ ընդդիմությունը, և, ի վերջո, այդ ծրագրերը չկատարելը վճռորոշ նշանակություն ունեցավ, որպեսզի երկիրը շարունակի շարժվել դեպի Եվրամիություն։ Մենք ունենք շատ հստակ օրակարգ, ունենք հավակնոտ նպատակ՝ մինչև 2030 թվականը դառնալ Եվրամիության անդամ։ Եվս մեկ անգամ կարող ենք վճռականորեն կրկնել, որ մինչև 2030 թվականը Վրաստանն ամենապատրաստը կլինի Եվրամիության անդամ դառնալու համար։ Համեմատած բոլոր թեկնածու երկրների հետ՝ Վրաստանն ավելի պատրաստ կլինի Եվրամիությանն անդամակցելու բոլոր առումներով՝ լինի դա ժողովրդավարություն, մարդու իրավունքներ, տնտեսություն, թե ցանկացած այլ բնագավառ»,- ասել է Իրակլի Կոբախիձեն։